Joriy yilning 17-oktabr kuni, taxminan soat 23:00 da “O‘zbekneftgaz” AJ Gazli neft va ga qazib chiqarish boshqarmasiga qarashli “Hojikazgan—Qumli—Chaqaqum” gazokondensat quvurlari avtoyo‘nalishi atrofida Milliy gvardiya qo‘riqlash xizmati xodimlari bilan hamkorlikda navbatdagi tezkor tadbir o‘tkazilgan.
Tadbir davomida Milliy gvardiya qo‘riqlash xizmati xodimlari tomonidan davlat raqam mavjud bo‘lmagan UAZ rusumli avtotransport vositasi to‘xtatib tekshirilgan.
Avtotransport yukxonasida bo‘lgan, har birining hajmi 60 litrni tashkil qiladigan 24 dona bo‘sh yelim bochka xolislar ishtirokida rasmiylashtirilib olingan.
Dastlabki o‘rganish natijalariga ko‘ra, haydovchi Buxoro viloyati Qorako‘l tumani, “Ziyorat” MFY, “Ziyorat” qishlog‘ida yashovchi fuqaro Abdujabbor Avezov hech qanday hujjatlarsiz avtomashinani boshqarib kelgani aniqlangan. Yelim bochkalar esa burg‘ilash ishlari olib borilayotgan uchastkalardan dizel yoqilg‘isini olib ketish maqsadida keltirilganligi aytilmoqda.
Hozirda O‘zbekiston Respublikasi Milliy gvardiyasi harbiy xizmatchilari tomonidan barcha hujjatlar rasmiylashtirilib, surishtiruv ishlari olib borilmoqda.
“O‘zbekneftgaz” AJ matbuot xizmati
Izoh (0)