Қашқадарёда сентябрь ойида тантанали равишда фойдаланишга топширилган вилоят мусиқали драма театри биносининг том қисми таъмирланмай қолгани маълум бўлди. Бу ҳақда Қарши шаҳридаги Журналистлар уйида бўлиб ўтган матбуот анжуманида вилоят Маданият бошқармаси бошлиғи Исоқ Тўраев маълум қилди.
Матбуот анжуманида сўз олган «Халқ сўзи» мухбири Фахриддин Бозоров Исоқ Тўраевга юзланиб, ижтимоий тармоқларда вилоят ҳокими бошчилигида тантанали равишда фойдаланишга топширилган театр биносининг томи тешиклиги, катта маблағ сафрланган бинода камчиликлар кўплиги ҳақида фикрлар пайдо бўлганини айтиб, бу қанчалик тўғри экани билан қизиқди.
«Томи тешик эмас, аммо таъмирланмай қолгани рост. Шу боис ёмғир ёғса, томидан сув ўтади. Аммо мен таъмир якунланишини сўраб, вазирликка хат билан мурожаат қилдим», — дейди саволга жавоб берган Исоқ Тўраев.
Масъулнинг қўшимча қилишича, том ёпилиши таъмирга ажратилган маблағ ҳисобидан бўлиши кўзда тутилган. Бироқ қурувчи ишни чала қолдирган.
«Дарё» мухбири вилоят Маданият бошқармаси бошлиғидан театр биноси таъмирига 17 миллиард сўм сарфлангани ҳақидаги маълумот қанчалик асосли экани билан қизиқди. Шунингдек, собиқ бошлиқнинг ишдан бўшашига сабаб бўлган омил — вилоятдаги маъданий тадбирларнинг ўтказилиши ҳоким Зоир Мирзаевга маъқул келмагани, раҳбар сифатида биринчи маротаба вилоятда бўлиб ўтган Мустақиллик байрамига бош-қош бўлгани, бу сафарги байрам Зоир Мирзаевга қанчалик маъқул келганини сўради.
«Бино таъмири учун 17 миллиард сарфлангани ҳақида менда аниқ маълумот йўқ. Менинг раҳбарлигимдаги Мустақиллик тантаналарининг вилоят раҳбарига қанчалик маъқул келганига тўхталадиган бўлсак, биласиз, Зоир Мирзаев ўта синчков ва талабчан. Ҳатто мусиқа тони ўзгарса ҳам сезади. Шу боис ҳам бастакорларим ҳам бир-бирига мусиқани тўғри чалиш кераклигини, вилоят ҳокими ҳатто мусиқа оҳангига ҳам баҳо беришини айтишиб, сергак бўлишга ҳаракат қилишади. Шу сабаб ҳам бу йилги байрам тадбирига вилоят ҳокимининг шахсан ўзи бош-қош бўлди ва менга йўл-йўриқ кўрсатиб турди. Қилган ишимиз кўп бўлмаса-да, маъқул келди», — дейди Исоқ Тўраев.
Эслатиб ўтамиз, аввалроқ Қашқадарё вилоят Маданият бошқармаси бошлиғи Салим Сайимов вилоят ҳокими танқидига дучор бўлгани сабаб ишдан олингани хабар берилганди. Зоир Мирзаев собиқ раҳбарни бўшатар экан, у ҳақда «Бошқарма бошлиғини бир неча маротаба огоҳлантиргандим, камчиликларини қайта-қайта эслатдим. Аммо хулоса қилмади. 1990 йилларда Қарши шаҳри маданият ўчоғи бўлган. Концерт дастурлари ва ижодий кечалар ўтказишда Қаршининг, Қашқадарёнинг ўз тажрибаси бор. Қани ўша масъулият? Нега бор имкониятдан фойдалана олмаймиз», — деганди.
Изоҳ (0)