Ijtimoiy tarmoqlarda Bobur G‘aniyev nomi bilan tanilgan bloger Jinoyat ishlari bo‘yicha Uchtepa tuman sudi qaroriga ko‘ra, 15 sutkaga qamalgani to‘g‘risida xabar berilgandi. 17-oktabr kuni Bobur G‘aniyev videomurojaat bilan chiqib, biznes bilan shug‘ullanayotgani sabab endi YouTube’dagi kanalini yuritishga vaqti bo‘lmasligini ma’lum qildi.
“Hurmatli yurtdoshlar, men bir biznes boshladim. O‘sha biznesimni yuritishim uchun YouTube’da o‘z faoliyatimni olib borishga endi vaqtim bo‘lmaydi… Meni to‘g‘ri tushunasizlar degan umiddaman”, — deydi avtobloger.
G‘aniyev o‘zining maqsadi qonuniylikni targ‘ib qilish bo‘lganini ta’kidlab, 30-sentabrdan 17-oktabrgacha ustida bo‘lgan kiyimlarni yoqib yuborgan. U o‘zining bundan harakatini “eski, negativ xotiralarni yo‘q qilish maqsadida”, deya izohlagan.
Eslatib o‘tamiz, 30-sentabr kuni Uchtepa tumani “Farhod” bozori ro‘parasida o‘tkazilayotgan “Xavfsiz poytaxt” profilaktik tadbiri davomida Toshkent shahar IIBB YHXB YPX inspektorlari tomonidan Epica rusumli avtomashina to‘xtatilgan.
Transport vositasi haydovchisi 1993-yilda tug‘ilgan Abror Kozubayevning hujjatlari tekshirilgan. Shu jarayonda Epica rusumli avtomashinada yo‘lovchi sifatida o‘tirgan 1987-yilda tug‘ilgan Bobur G‘aniyev (internetda YPX xodimlarini tanqid qilgan videolari bilan tanilgan) YPX inspektorlarini haqorat qilib, janjal ko‘targan. IIO xodimlarining qonuniy talablariga bo‘ysunmasdan jamoat tartibini buzgan.
Shundan so‘ng transport vositasining haydovchisi, yo‘lovchilari Bobur G‘aniyev va Obit Salimov Uchtepa tumani IIO FMBga olib borilgan. Holat yuzasidan hujjatlarni rasmiylashtirish va tekshiruv o‘tkazish jarayonida Bobur G‘aniyevning shaxsiy uyali telefon apparatida pornografik mazmundagi, qonunda taqiqlangan videomateriallar va fotosuratlar borligi aniqlangan.
Yuz bergan holat bo‘yicha to‘plangan hujjatlar Jinoyat ishlari bo‘yicha Uchtepa tuman sudiga taqdim etilgan. Unga ko‘ra, Bobur G‘aniyev Ma’muriy javobgarlik to‘g‘risidagi kodeksning 41-moddasida ko‘rsatilgan huquqbuzarlikni sodir etgani uchun (haqorat qilish) BHMning 20 barobari (5,4 million so‘m), 194-modda (ichki ishlar organlari xodimining qonuniy talablarini bajarmaslik) bo‘yicha BHMning 1 baravari (270 ming so‘m), 195-modda (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) bo‘yicha esa 15 sutka ma’muriy qamoq jazosi belgilangan.
Izoh (0)