Toshkent shahar Uchtepa tumani hokimligi ijtimoiy tarmoqlarda tumanda yangi maktab qurish ko‘zda tutilmagani, lekin 3,7 trillion so‘mga “siti” qurilishi to‘g‘risida tarqalgan xabarlarga munosabat bildirdi.
Moliya vazirligi Vazirlar Mahkamasining “2021—2023-yillarda Toshkent shahrining Uchtepa tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi qarori loyihasini muhokamaga qo‘ygan. Iqtisodchi Otabek Bakirovning yozishicha, loyihada aholisi tabiiy va ichki migratsiya hisobiga o‘sib borayotgan Uchtepa tumanida birorta yangi davlat maktabini qurish ko‘zda tutilmagan, biroq 2022-yil dekabrga qadar “Uchtepa siti” qurilishi qayd etilgan.
Hokimlikning ma’lum qilinishicha, haqiqaan ham, 2020—2024-yillar davomida Uchtepa tumanida loyiha qiymati 350 million dollarga teng bo‘lgan “Zamonaviy Uchtepa shaharchasi”ni barpo etish rejalashtirilgan. Ushbu loyiha tarkibida, istirohat bog‘i, sport kompleksi, mehmonxonalar bilan bir qatorda ijtimoiy ko‘makga muhtoj aholi uchun bolalar bog‘chasi, maktab va tibbiy klinika loyihalarini amalga oshirish ham belgilangan.
Natijada esa 6500 ta yangi ish o‘rinlari tashkil etilib, band bo‘lmagan aholi ish bilan ta’minlanadi va daromad manbasiga ega bo‘ladi.
“Eng qizig‘i ushbu shaharchaning qurilishi uchun davlat budjetidan umuman mablag‘ jalb etilmaydi, balki barcha xarajatlar tashabbuskor tadbirkorlar hisobidan qoplanadi”, — deyiladi musobatda.
2020-yilda esa Vazirlar Mahkamasining tegishli qarorlari bilan bir yilda 10 ta umumta’lim maktablarni mukammal ta’mirlash uchun 69,3 milliard so‘mdan ortiq budjet mablag‘lari ishlatilgan. Bundan tashqari, 2021-yilda Investitsiya va “Obod mahalla” dasturlari doirasida jami 7 ta maktabda qurilish-ta’mirlash ishlari olib borilmoqda.
Toshkent shahar hokimligi va tumani mahalliy budjet mablag‘lari hisobidan 2021-yilda 15 ta maktabda 7 milliard 640 million so‘m evaziga joriy ta’mirlash ishlari olib borgan. Tuman hokimining 2021-yildagi qarori bilan uchta maktabdagi sport maydonchalarini zamonaviy qiyofaga keltirish uchun qariyb 1,5 milliard so‘m va tuman hokimining farmoyishi bilan yana bir maktab hududini asfaltlashtirish uchun 180 million so‘m ajratilgan.
Izoh (0)