Ijtimoiy tarmoqlarda noma’lum shaxs yo‘l harakati qoidabuzarliklarini tasvirga olib, ichki ishlar organlariga jo‘natmoqchi bo‘lgan fuqaroni “samosud” qilishga uringani aks etgan video tarqalgandi. “Yoshlar” telekanalining “Yangi davr” informatsion dasturida ma’lum qilinishicha, huquqbuzarlik sodir etgan mazkur shaxs va uning sheriklari javobgarlikka tortilgan.
Ma’lum qilinishicha, videodagi voqea 1-oktabr kuni soat 17:00 da Uchtepa tumani Toshkent halqa avtomobil yo‘lida, “O‘rikzor” bozori yaqinida sodir bo‘lgan. Huquqbuzar 1996-yilda tug‘ilgan X.E. ekani aniqlangan va Uchtepa tumani IIO FMB 3-sonli ichki ishlar bo‘limiga yetkazilib, u bilan profilaktik suhbat o‘tkazilgan.
Ma’lum bo‘lishicha, jabrlanuvchi qoidabuzarlar iddao qilganidek fotolarni yig‘ib, YPX xodimlariga jo‘natish bilan shug‘ullanmagan, uning bunday ishga aloqasi yo‘q. Keyinroq X.E. holat uchun fuqarodan uzr so‘rab, videomurojaat qilgandi. “Tushunmovchilik bo‘lib, videoda aytgan gapim noto‘g‘ri, akamiz unday inson emas ekan. O‘zlaridan ham uzr so‘radim”, — degan huquqbuzar.
To‘plangan hujjatlar Jinoyat ishlari bo‘yicha Uchtepa tuman sudi tomonidan ko‘rib chiqilgan. Sud qaroriga ko‘ra ushbu fuqaro X.E. Ma’muriy javobgarlik to‘g‘risidagi kodeksning tegishli moddalariga binoan aybdor deb topilgan va unga jarima hamda 12 sutka ma’muriy qamoq jazosi tayinlangan.
Shuningdek, holatni tasvirga olgan va “samosud” paytida X.E.ning yonida bo‘lgan ikki sherigi ham jarimaga tortilib, 10 sutkaga qamalgan.
Avvalroq Toshkentda qoidabuzar haydovchilarni suratga olib, IIBga jo‘natgani aytilgan fuqaro bilan janjallashgan shaxslar qidirilayotgani haqida xabar berilgan edi.
Izoh (0)