Тошкент шаҳар Учтепа тумани ҳокимлиги ижтимоий тармоқларда туманда янги мактаб қуриш кўзда тутилмагани, лекин 3,7 триллион сўмга «сити» қурилиши тўғрисида тарқалган хабарларга муносабат билдирди.
Молия вазирлиги Вазирлар Маҳкамасининг «2021—2023 йилларда Тошкент шаҳрининг Учтепа туманини комплекс ижтимоий-иқтисодий ривожлантириш чора-тадбирлари тўғрисида»ги қарори лойиҳасини муҳокамага қўйган. Иқтисодчи Отабек Бакировнинг ёзишича, лойиҳада аҳолиси табиий ва ички миграция ҳисобига ўсиб бораётган Учтепа туманида бирорта янги давлат мактабини қуриш кўзда тутилмаган, бироқ 2022 йил декабрга қадар «Учтепа сити» қурилиши қайд этилган.
Ҳокимликнинг маълум қилинишича, ҳақиқаан ҳам, 2020—2024 йиллар давомида Учтепа туманида лойиҳа қиймати 350 миллион долларга тенг бўлган «Замонавий Учтепа шаҳарчаси»ни барпо этиш режалаштирилган. Ушбу лойиҳа таркибида, истироҳат боғи, спорт комплекси, меҳмонхоналар билан бир қаторда ижтимоий кўмакга муҳтож аҳоли учун болалар боғчаси, мактаб ва тиббий клиника лойиҳаларини амалга ошириш ҳам белгиланган.
Натижада эса 6500 та янги иш ўринлари ташкил этилиб, банд бўлмаган аҳоли иш билан таъминланади ва даромад манбасига эга бўлади.
«Энг қизиғи ушбу шаҳарчанинг қурилиши учун давлат бюджетидан умуман маблағ жалб этилмайди, балки барча харажатлар ташаббускор тадбиркорлар ҳисобидан қопланади», — дейилади мусобатда.
2020 йилда эса Вазирлар Маҳкамасининг тегишли қарорлари билан бир йилда 10 та умумтаълим мактабларни мукаммал таъмирлаш учун 69,3 миллиард сўмдан ортиқ бюджет маблағлари ишлатилган. Бундан ташқари, 2021 йилда Инвестиция ва «Обод маҳалла» дастурлари доирасида жами 7 та мактабда қурилиш-таъмирлаш ишлари олиб борилмоқда.
Тошкент шаҳар ҳокимлиги ва тумани маҳаллий бюджет маблағлари ҳисобидан 2021 йилда 15 та мактабда 7 миллиард 640 миллион сўм эвазига жорий таъмирлаш ишлари олиб борган. Туман ҳокимининг 2021 йилдаги қарори билан учта мактабдаги спорт майдончаларини замонавий қиёфага келтириш учун қарийб 1,5 миллиард сўм ва туман ҳокимининг фармойиши билан яна бир мактаб ҳудудини асфальтлаштириш учун 180 миллион сўм ажратилган.
Изоҳ (0)