Toshkentda fuqaro o‘z hayoti uchun xavf tug‘dirib, Matiz eshigiga osilgan holda suratkashlik qilayotgani aks etgan surat ijtimoiy tarmoqlarda keng tarqalgandi. Toshkent shahar IIBB ushbu shaxs va mashina haydovchisi jarimaga tortilganini ma’lum qildi.
Aniqlanishicha, holat 9-oktabr kuni, taxminan, soat 14:00 da ro‘y bergan. Matiz’ni ishonchnoma asosida 22 yoshli J.X. boshqargan, suratkashlik qilayotgan shaxs esa 26 yoshli U.E. bo‘lgan.
Yo‘lovchiga nisbatan Ma’muriy javobgarlik to‘g‘risidagi kodeksning 138-moddasi 4-qismi (transport vositasi harakatlanayotgan vaqtda yo‘lovchi tomonidan tana qismlarini (qo‘ldan tashqari) salondan chiqarish bo‘yicha ma’muriy bayonnoma rasmiylashtirilib, BHMning 1 baravari — 270 ming so‘m miqdorida jarima belgilangan. Avtomobil haydovchisi ham jarimaga tortilgan.
“Hurmatli fotosuratchilar, operatorlar va shu kabi kasblar egalari. Yuqoridagi holatga o‘xshash xatti-harakatlar nafaqat qoidabuzarlik hisoblanadi, balki o‘z salomatligingiz va hayotingizni xavf ostiga qo‘yadi. Xavfsizligingizga qanchalik ishonishingizdan qat’i nazar, yo‘llarda ro‘y berishi mumkin bo‘lgan turli holatlarda bu ishingiz fojiali yakunlanishi mumkin”, — deya fuqarolarni ogohlikka chaqirgan poytaxt IIBB.
Izoh (0)