Shavkat Mirziyoyev Qashqadaryo viloyati qatag‘on qurbonlari xotirasi muzeyini borib ko‘rdi, deya xabar bermoqda “Daryo” muxbiri.
O‘zbekiston Prezidentining 2020-yil 8-oktabrdagi farmoyishiga muvofiq, qatag‘on qurbonlarining xotirasini abadiylashtirish va merosini o‘rganish bo‘yicha ko‘p ishlar qilinmoqda. Qoraqalpog‘iston va barcha viloyatlarda qatag‘on qurbonlari muzeyi tashkil etildi.
Qashqadaryodagi muzey Odina masjidida joylashtirilgan. Qayd etilishicha, bu chuqur ma’noga ega. Chunki u tarixiy bino.
Odina masjidi 1386-yilda Sohibqiron Amir Temur tomonidan bunyod etilgan. 1868-yili Chor Rossiyasi bosqini davrida masjidning ayvon qismi to‘pga tutilib, vayron qilingan. Mustabid tuzum davrida dastlab omborxonaga, 1938-yildan qamoqxonaga aylantirilgan.
“Mustabid tuzum davrida xalqimizning qadr-qimmati, insoniy sha’ni va g‘ururi oyoqosti qilingan. Shunday tabarruk joyning qamoqxonaga aylantirilgani ham bunga misol. Biz bugun mamlakatimizda inson qadrini ulug‘lashga alohida e’tibor qaratyapmiz. O‘tganlar hurmatini ham joyiga qo‘yishimiz kerak. Bu yerda Qatag‘on qurbonlari xotirasi muzeyi tashkil etilgani — tarixiy adolatning tiklanishi”, — dedi Prezident.
Muzey 11 ta bo‘limdan iborat. Ularda Turkiston o‘lkasida olib borilgan mustamlakachilik siyosati va qatag‘onlarni aks ettiruvchi noyob tarixiy fotosuratlar, xaritalar, ashyolar va boshqa manbalar aks ettirilgan.
Shuningdek, muzeyda yoshlar klubi hamda kutubxona tashkil qilingan.
Davlat rahbari shu yerda jurnalistlarning savollariga javob berdi.
Shu bilan Shavkat Mirziyoyev Qashqadaryo viloyatiga tashrifini yakunlab, Buxoroga yo‘l oldi.
Mavzuga doir:
- Shavkat Mirziyoyev Qarshidagi Prezident maktabiga tashrif buyurib, o‘quvchilar bilan suhbatlashdi
- “Qashqadaryoning bir qator tumanlarida bog‘cha to‘lovi 2 barobarga kamaytiriladi” – Shavkat Mirziyoyev
- Shavkat Mirziyoyev Chiroqchini ikkiga bo‘lish, Shahrisabz tumani markazini esa boshqa joyga ko‘chirish taklifini berdi
Izoh (0)