“Qamoqxonalarda qiynoq holatlarini deyarli uchratganim yo‘q” — ombudsman

Toshkentda “O‘zbekistonda milliy preventiv mexanizmni xalqaro standartlar asosida rivojlantirish istiqbollari” mavzusida xalqaro konferensiya bo‘lib o‘tdi, deb xabar bermoqda “Gazeta.uz”.

Tadbir davomida O‘zbekiston inson huquqlari bo‘yicha vakili jurnalistlarning bir qator savollariga javob berar ekan, mahkumlardan ombudsmanga kelib tushayotgan murojaatlarga ham to‘xtalib o‘tgan.

Feruza Eshmatovaning ta’kidlashicha, “ombudsman o‘zining faoliyatini kelib tushayotgan murojaatlarga qarab baholaydi”.

“Hozirgi kunda jazoni ijro etish muassasalarida men o‘zim qiynoq holatlarini deyarli uchratganim yo‘q. Ular bilan suhbatlashganimizda, shu paytgacha ularning hech qaysisidan, masalan, ‘meni bu qiynayapti’, ‘urdi’ yoki qanaqadir ‘ruhiy tazyiq, bosim, qiynoqlar o‘tkazyapti’ degan [murojaat] bo‘lmadi. Bugungi kunga qadar 120 ga yaqin monitoring tashrifi o‘tkazdik. Lekin bizga hali bunday murojaat kelib tushgani yo‘q”, — dedi u.

Ombudsmanning so‘zlariga qaraganda, murojaatlarning asosiy qismini sud hukmidan noroziliklar tashkil etgan.

Inson huquqlari bo‘yicha vakilning matbuot kotibi Fotima Madrahimovaning aniqlik kiritishicha, 2019-yilda — 46 ta, 2020-yilda — 71 ta, 2021-yilning 9 oyida — 120 ta monitoring tashrif o‘tkazilgan.

“O‘tkazilgan monitoring tashriflar davomida mahkumlarni qamoqda saqlash sharoitlari, ya’ni yashash va ovqatlanish, mehnat qilish va tibbiy yordam ko‘rsatish holati va sifati, mahkumlar uchun olib borilayotgan ma’naviy-ma’rifiy ishlar hamda koronavirus pandemiyasi davrida sanitariya-gigiyena talablariga rioya etilayotganligi, ta’lim-tarbiya berish va boshqa shu kabi holatlar o‘rganilgan”, — dedi ombudsman matbuot kotibi.