Sirdaryo viloyatining Guliston tumani hokimi o‘rinbosari “ayollar daftari”ga kiritilgan fuqaroni arzonlashtirilgan uy oluvchilar ro‘yxatiga kirgizib qo‘yish uchun pora olayotgan vaqtida qo‘lga olingani to‘g‘risida xabar berilgandi. “Sirdaryo xabarlari”ning yozishicha, hokim o‘rinbosari va unga yordam bergan shaxsga nisbatan sud hukmi o‘qilgan.
Ma’lum qilinishicha, “Chorvanasl” markazi Guliston tumani yetakchi mutaxassisi M.X. “ayollar daftari”ga kiritilgan M.K. ismli fuqaroga tumanning “Yulduz” massivida kam ta’minlangan oilalar uchun qurilayotgan uy-joylardan xonadon olishi uchun ro‘yxatga qo‘yishda yordam berishini aytgan. U buning evaziga Guliston tumani hokimi o‘rinbosari B.S.ga 400 dollar miqdorida pora berish kerakligini ma’lum qilgan. M.X. Guliston tumani veterinariya va chorvachilikni rivojlantirish bo‘limi ma’muriy binosida fuqaro M.K.dan 400 dollarni olgan vaqtida ashyoviy dalillar bilan ushlangan.
Shundan so‘ng M.X.ning arizasiga asosan shu kuni tezkor tadbir davom ettirilgan. Unda Guliston tumani hokimining sanoatni rivojlantirish, kapital qurilish, kommunikatsiya va kommunal xo‘jalik masalalari bo‘yicha birinchi o‘rinbosari B.S. fuqaroga uy olib berishida yordam qilishi evaziga talab qilgan 400 dollarni M.X.dan olgan vaqtida ashyoviy dalillar bilan ushlangan.
Holat yuzasidan ko‘rib chiqilgan sud ishida hokim o‘rinbosari Jinoyat kodeksining tegishli moddalari bilan aybli deb topilgan va u 2 yil 6 oy muddatga davlat organlarida mansabdorlik va moddiy javobgarlik bilan bog‘liq lavozimlarda ishlash huquqidan mahrum qilgan. Shuningdek, unga nisbatan bazaviy hisoblash miqdorining 300 baravari miqdorida (73,5 million so‘m) jarima jazosi qo‘llanilgan.
Hokim o‘rinbosariga yordam bergan M.X. esa 2 yil muddatga davlat organlarida mansabdorlik va moddiy javobgarlik bilan bog‘liq lavozimlarda ishlash huquqidan mahrum qilingan. Shuningdek, unga nisbatan 2 yil 2 oy ozodlikni cheklash jazosi tayinlangan.
Avvalroq Namanganda tuman hokimi o‘rinbosari 10 ming dollar pora olayotganida ushlangani, Jizzax shahar hokimining birinchi o‘rinbosari vazifasini bajaruvchi shaxs 2 ming dollar pora olayotganida qo‘lga tushgani to‘g‘risida xabar berilgandi.
Izoh (0)