Сирдарё вилоятининг Гулистон тумани ҳокими ўринбосари «аёллар дафтари»га киритилган фуқарони арзонлаштирилган уй олувчилар рўйхатига киргизиб қўйиш учун пора олаётган вақтида қўлга олингани тўғрисида хабар берилганди. «Сирдарё хабарлари»нинг ёзишича, ҳоким ўринбосари ва унга ёрдам берган шахсга нисбатан суд ҳукми ўқилган.
Маълум қилинишича, «Чорванасл» маркази Гулистон тумани етакчи мутахассиси М.Х. «аёллар дафтари»га киритилган М.К. исмли фуқарога туманнинг «Юлдуз» массивида кам таъминланган оилалар учун қурилаётган уй-жойлардан хонадон олиши учун рўйхатга қўйишда ёрдам беришини айтган. У бунинг эвазига Гулистон тумани ҳокими ўринбосари Б.С.га 400 доллар миқдорида пора бериш кераклигини маълум қилган. М.Х. Гулистон тумани ветеринария ва чорвачиликни ривожлантириш бўлими маъмурий биносида фуқаро М.К.дан 400 долларни олган вақтида ашёвий далиллар билан ушланган.
Шундан сўнг М.Х.нинг аризасига асосан шу куни тезкор тадбир давом эттирилган. Унда Гулистон тумани ҳокимининг саноатни ривожлантириш, капитал қурилиш, коммуникация ва коммунал хўжалик масалалари бўйича биринчи ўринбосари Б.С. фуқарога уй олиб беришида ёрдам қилиши эвазига талаб қилган 400 долларни М.Х.дан олган вақтида ашёвий далиллар билан ушланган.
Ҳолат юзасидан кўриб чиқилган суд ишида ҳоким ўринбосари Жиноят кодексининг тегишли моддалари билан айбли деб топилган ва у 2 йил 6 ой муддатга давлат органларида мансабдорлик ва моддий жавобгарлик билан боғлиқ лавозимларда ишлаш ҳуқуқидан маҳрум қилган. Шунингдек, унга нисбатан базавий ҳисоблаш миқдорининг 300 баравари миқдорида (73,5 миллион сўм) жарима жазоси қўлланилган.
Ҳоким ўринбосарига ёрдам берган М.Х. эса 2 йил муддатга давлат органларида мансабдорлик ва моддий жавобгарлик билан боғлиқ лавозимларда ишлаш ҳуқуқидан маҳрум қилинган. Шунингдек, унга нисбатан 2 йил 2 ой озодликни чеклаш жазоси тайинланган.
Аввалроқ Наманганда туман ҳокими ўринбосари 10 минг доллар пора олаётганида ушлангани, Жиззах шаҳар ҳокимининг биринчи ўринбосари вазифасини бажарувчи шахс 2 минг доллар пора олаётганида қўлга тушгани тўғрисида хабар берилганди.
Изоҳ (0)