Американинг Time журнали, Facebook ва бошқа бир қатор сервислардаги глобал узилишлардан сўнг компания асосчиси Марк Цукербергнинг суратини ўз муқовасига жойлаштирди. Сурат устида тасдиқлаш ойнаси кўрсатилган. Унда «Facebook ўчирилсинми?» саволи ҳамда унга жавоб тариқасида «Чиқиш» ва «Ўчириш» вариантлари таклиф этилган.
Нашрнинг ушбу муқова билан чоп этилган сонида америкалик тадбиркор ва сармоядор Рожер Макнамининг муаллифлик колонкаси ҳам чиқарилган. Унда у Facebook «ўзини ўзи тузатмайди», деб баҳс юритади ва ечим сифатида учта чора таклиф қилади — махсус тартибга солиш органини яратиш, фойдаланувчиларнинг махфий маълумотларидан фойдаланишни тақиқлаш ва АҚШнинг монополияга қарши қонунларини янгилаш.
Facebook, WhatsApp, Instagram ва бир қатор Google сервислари 4 октябрь куни бир неча соат ишламай қолди. Downdetector портали буни тарихдаги энг йирик узилишлар деб атади. Сервис маълумотларига кўра, муаммо ҳақида унга дунё бўйлаб 10,6 миллиондан ортиқ хабар келиб тушган.
Facebook хабарига кўра, узилишлар магистрал роутер конфигурациясини ўзгартириш билан боғлиқ. Компания муҳандислари Facebook маълумотлар марказлари ўртасида трафикни тақсимлайдиган роутер конфигурациясини ўзгартиришда хатоликка йўқ қўйган, бу алоқа узилишига олиб келган, натижада «домино эффекти бўйича маълумотлар марказлари ўртасидаги алоқа ҳам узилган».
Узилишдан сўнг Цукерберг воқеа учун узр сўради. Тармоқдаги муаммолар фонида Цукербергнинг бойлиги 4 октябрь куни кечқурун 6 миллиард долларга камайиб, 116,4 миллиард долларгача тушиб кетди, Facebook акциялари эса 5 фоизга арзонлашди.
Узилишлар фонида АҚШда Facebook’нинг фаолияти билан боғлиқ масалалар фаол муҳокама қилина бошлади. Хусусан, Facebook’нинг собиқ менежери Френсес Хауген Сенатдаги чиқишида компания тизимли равишда фойдаланувчилар хавфсизлигидан кўра даромадни биринчи ўринга қўйишини ва жамиятга кўрсатаётган таъсирига унчалик аҳамият бермаслигини айтди. Унинг фикрича, ижтимоий тармоқ болаларга зарар етказади, уларда ўз таналарига нисбатан салбий ҳисни шакллантиради.
Цукерберг айбловларга изоҳ берар экан, Facebook фойдаланувчиларининг хавфсизлиги, фаровонлиги ва руҳий саломатлиги каби муаммолар ҳақида «чуқур қайғуришини» айтди. Шунингдек, у Facebook’нинг болалар учун ота-она назорати ва кўплаб ҳимоя механизмлари билан таъминланадиган версияси борлигини эслатди.
Изоҳ (0)