Namanganlik jurnalist Muhammadali Qambarov mehribonlik uyining 5 nafar tarbiyalanuvchisini qaramog‘iga oldi. Bu haqda “Daryo” muxbiri Azizbek Abduvaliyev xabar bermoqda.
Muhammadali Qambarov 45 yoshda. Uychi tuman hokimligi axborot xizmati rahbari, “Uychinoma” gazetasi muharriri. Turmush o‘rtog‘i Nargizaxon o‘qituvchi, tumandagi maktablardan birida matematikadan dars beradi. O‘zlari ikki nafar qiz — 19 yashar Durdona va 15 yoshni qarshilagan Dilshodani tarbiyalashmoqda.
“Tuman hokimligining ijtimoiy tarmoqlardagi sahifalarida yangi tizim joriy etilgani, mehribonlik uyi tarbiyalanuvchilarini oilaviy mehribonlik uylari bag‘riga olayotgani haqidagi materialni joylashtirdim, lekin o‘sha payt bunga u qadar e’tibor bermadim. Keyinchalik buning tartib-qoidalari haqda tanishlarimizdan biri sinchiklab so‘rab qoldi. Shu bahona materialni yana qaytadan o‘qib chiqdim. Ertasiga esa Namangan shahridagi 26-mehribonlik uyiga yo‘l oldim”, — deya hikoya qiladi Muhammadali.
Bundan uch yil avval jurnalistning xonadonida musibat yuz bergandi. Oilaning yolg‘iz o‘g‘li og‘ir xastalikka chalindi. Uni shifokorlarga qaratish va davolashga bo‘lgan urinishlar, afsuski, naf bermadi. Bekzod 9 yoshida olamdan o‘tdi.
“Shu o‘tgan vaqt davomida faqat ish bilan ovundim. Uyimiz go‘yo huvullab qolgandek edi. Farzand dog‘i odamni cho‘ktirib qo‘yar ekan. Shu sabab mehribonlik uyiga kamida 5 nafar bolani asrab olaman, degan niyatda bordim. Avvaliga 2 qiz va 3 o‘g‘il bolani beradigan bo‘lishdi. Keyin esa “Sizga 5 nafar o‘g‘il bolani bersak-chi?” deb so‘rashdi. Bu biz uchun ayni muddao edi. Yo‘qotgan o‘g‘limizning o‘rniga besh nafar azamatni bag‘rimizga oldik. Xonadonimiz yana yigitchalarning o‘ktam kulgisi bilan to‘ldi, uyimizga fayz kirgandek bo‘ldi”, — deydi Muhammadali.
Qambarovlarning “Yorqin kelajak” deya nomlangan oilaviy mehribonlik uyiga qabul qilingan bolalarning eng kattasi 18, kichigi esa 12 yoshda. Ularning ikki nafari — Doston va Doniyor aka-ukalar.
“Mehribonlik uyida 5 yil davomida tarbiyalandik. O‘zimiz asli shu yerdan — Uychidanmiz. Sevgan mashg‘ulotim kitob o‘qish, “Yosh kitobxon” tanlovining viloyat bosqichida ham qatnashganman. 200 ga yaqin kitobni o‘qib chiqqan bo‘lsam kerak, yodda qolgani Said Ahmadning “Jimjitlik” romani bo‘lgan. Ukam Doniyor sportga, xususan, jiu-jitsuga qiziqadi, rasm chizishga ham ancha qo‘li kelib qolgan. Ikkalamiz ham kelgusida “Temurbeklar maktabi”da o‘qish va Milliy gvardiya xodimlari safidan o‘rin olishni niyat qilganmiz”, — deydi Doston.
Qambarovlar xonadoniga 5 nafar o‘g‘ilning kirib kelishi oila istiqomat qiladigan “Hurriyat” mahallasida haqiqiy to‘yga aylanib ketdi. Keksalar tomonidan duo-fotiha qilindi, tuman hokimligi maishiy texnika jihozlarini taqdim etdi. Kun yakunida esa endi katta oilaga aylangan Qambarovlar bir dasturxon atrofida jamuljam bo‘ldi.
Ma’lumot uchun, Namangan shahridagi 26-mehribonlik uyida bugungi kunga kelib atigi 10 nafar tarbiyalanuvchi qoldi. Yil boshida ularning soni 72 nafar edi.
Izoh (0)