Наманганлик журналист Муҳаммадали Қамбаров меҳрибонлик уйининг 5 нафар тарбияланувчисини қарамоғига олди. Бу ҳақда «Дарё» мухбири Азизбек Абдувалиев хабар бермоқда.
Муҳаммадали Қамбаров 45 ёшда. Уйчи туман ҳокимлиги ахборот хизмати раҳбари, «Уйчинома» газетаси муҳаррири. Турмуш ўртоғи Наргизахон ўқитувчи, тумандаги мактаблардан бирида математикадан дарс беради. Ўзлари икки нафар қиз — 19 яшар Дурдона ва 15 ёшни қаршилаган Дилшодани тарбиялашмоқда.
«Туман ҳокимлигининг ижтимоий тармоқлардаги саҳифаларида янги тизим жорий этилгани, меҳрибонлик уйи тарбияланувчиларини оилавий меҳрибонлик уйлари бағрига олаётгани ҳақидаги материални жойлаштирдим, лекин ўша пайт бунга у қадар эътибор бермадим. Кейинчалик бунинг тартиб-қоидалари ҳақда танишларимиздан бири синчиклаб сўраб қолди. Шу баҳона материални яна қайтадан ўқиб чиқдим. Эртасига эса Наманган шаҳридаги 26-меҳрибонлик уйига йўл олдим», — дея ҳикоя қилади Муҳаммадали.
Бундан уч йил аввал журналистнинг хонадонида мусибат юз берганди. Оиланинг ёлғиз ўғли оғир хасталикка чалинди. Уни шифокорларга қаратиш ва даволашга бўлган уринишлар, афсуски, наф бермади. Бекзод 9 ёшида оламдан ўтди.
«Шу ўтган вақт давомида фақат иш билан овундим. Уйимиз гўё ҳувуллаб қолгандек эди. Фарзанд доғи одамни чўктириб қўяр экан. Шу сабаб меҳрибонлик уйига камида 5 нафар болани асраб оламан, деган ниятда бордим. Аввалига 2 қиз ва 3 ўғил болани берадиган бўлишди. Кейин эса «Сизга 5 нафар ўғил болани берсак-чи?» деб сўрашди. Бу биз учун айни муддао эди. Йўқотган ўғлимизнинг ўрнига беш нафар азаматни бағримизга олдик. Хонадонимиз яна йигитчаларнинг ўктам кулгиси билан тўлди, уйимизга файз киргандек бўлди», — дейди Муҳаммадали.
Қамбаровларнинг «Ёрқин келажак» дея номланган оилавий меҳрибонлик уйига қабул қилинган болаларнинг энг каттаси 18, кичиги эса 12 ёшда. Уларнинг икки нафари — Достон ва Дониёр ака-укалар.
«Меҳрибонлик уйида 5 йил давомида тарбияландик. Ўзимиз асли шу ердан — Уйчиданмиз. Севган машғулотим китоб ўқиш, «Ёш китобхон» танловининг вилоят босқичида ҳам қатнашганман. 200 га яқин китобни ўқиб чиққан бўлсам керак, ёдда қолгани Саид Аҳмаднинг «Жимжитлик» романи бўлган. Укам Дониёр спортга, хусусан, жиу-житсуга қизиқади, расм чизишга ҳам анча қўли келиб қолган. Иккаламиз ҳам келгусида «Темурбеклар мактаби»да ўқиш ва Миллий гвардия ходимлари сафидан ўрин олишни ният қилганмиз», — дейди Достон.
Қамбаровлар хонадонига 5 нафар ўғилнинг кириб келиши оила истиқомат қиладиган «Ҳуррият» маҳалласида ҳақиқий тўйга айланиб кетди. Кексалар томонидан дуо-фотиҳа қилинди, туман ҳокимлиги маиший техника жиҳозларини тақдим этди. Кун якунида эса энди катта оилага айланган Қамбаровлар бир дастурхон атрофида жамулжам бўлди.
Маълумот учун, Наманган шаҳридаги 26-меҳрибонлик уйида бугунги кунга келиб атиги 10 нафар тарбияланувчи қолди. Йил бошида уларнинг сони 72 нафар эди.
Мавзуга доир:
Изоҳ (0)