Prezident Shavkat Mirziyoyev 7-oktabr kuni Sirdaryo viloyatiga kelib, Sirdaryo Mega Luks qo‘shma korxonasi faoliyati bilan tanishdi. Bu haqda davlat rahbarining matbuot xizmati xabar berdi.
Ma’lum qilinishicha, 2020-yili bu yerda polipropilendan katta sig‘imli qoplar ishlab chiqarish yo‘lga qo‘yilgan. “Yumshoq konteyner” deb ataluvchi bu qoplar 500 kilogrammdan 5000 kilogrammgacha yuk ko‘taradi. Ularga ishlab chiqarish, savdo, qishloq xo‘jaligi, logistika kabi ko‘plab sohalarda talab yuqori. Sirdaryo Mega Luks yiliga 132 million dona shunday mahsulot tayyorlash quvvatiga ega.
Yettita korpusdan iborat ulkan korxona izchil rivojlanib bormoqda. 2021-yil may oyida ikki qavatli plyonka tayyorlash yo‘lga qo‘yilgan. Yaqin oylarda strech plyonka va spanbond texnologiyasi asosida noto‘qima mato ishlab chiqarish boshlanadi.
Hozirda korxonada 2 mingdan ortiq kishi ish bilan ta’minlangan. Mazkur loyihalar to‘liq quvvatga chiqqach, ish o‘rinlari 5 mingga yetadi. Bugungi kunda Rossiya, Isroil, Belarus, Ukraina, Qozog‘iston kabi 14 ta mamlakatga eksport yo‘lga qo‘yilgan. Yangi loyihalar bilan birgalikda eksport hajmi 215 million dollarga yetishi mo‘ljallangan.
Shavkat Mirziyoyevga istiqboldagi loyihalar haqida ham ma’lumot berilgan.
Unga ko‘ra, kelgusi besh yilda polimer mahsulotlari ishlab chiqarish bo‘yicha texnopark tashkil etib, umumiy qiymati 350 million dollar bo‘lgan sakkizta loyihani amalga oshirish rejalashtirilgan. Buning uchun 260 million dollar investitsiya jalb etilib, Germaniya, Italiya, Avstriya texnologiyasi o‘rnatiladi.
Prezident loyihalarning iqtisodiy samaradorligi bilan birga ijtimoiy jihatiga ham alohida e’tibor qaratish zarurligini ta’kidlagan.
“Bu mahsulotlarning xomashyosi o‘zimizda, ona zaminimizda. Bundan aql bilan foydalanib, narx va sifat mutanosibligi ta’minlansa, mahsulotlarimiz raqobatbardosh bo‘ladi. Faqat iqtisodiy emas, iqtisodiy-ijtimoiy loyihalar qilish kerak. Tadbirkor ham daromad topsin, odamlar ham”, — deydi Shavkat Mirziyoyev.
Shuningdek, zarur mablag‘ yo‘naltirib, ishlab chiqarish hajmini ikki barobar oshirish, kelgusida ishchilar uchun uy-joylar barpo etish bo‘yicha ko‘rsatmalar berilgan.
Avvalroq Shavkat Mirziyoyev Andijondagi “Yangi avlod” xususiy maktabi faoliyati bilan tanishgani to‘g‘risida xabar berilgandi.
Izoh (0)