2020 йилнинг декабрь ойида Вазирлар Маҳкамасининг қарори билан Про-Лига 2021 йилги мавсумида ҳаракат қилиши белгиланган «Арал Самали» айни дамга келиб муаммолар қуршовида қолгани айтилмоқда.
ПФЛ бош директори вазифасини бажарувчи Диёр Имомхўжаевнинг маълум қилишича, қорақалпоқ клуби 2 октябрь куни «Арал» U-14, U-16, U-18 жамоалари билан мусобақада ўйнай олмаслиги борасида ПФЛга хат жўнатган. Хатда асосий таркибнинг ҳам сафар учрашувларида иштирок этиши ҳам сўроқ остида экани кўрсатилган.
Бундан келиб чиқиб хулоса қилинса, клуб молиявий муаммолар ичида қолган.
Вазирлар Маҳкамасининг 2020 йилнинг декабрь ойидаги «Қорақалпоғистонда профессионал футболни ривожлантириш, «Арал» футбол жамоасини қўллаб-қувватлаш, унинг моддий-техник базасини мустаҳкамлаш ҳамда кадрлар салоҳиятини ошириш чора-тадбирлари тўғрисида»ги қарорига кўра «Арал Самали» клуби истисно тариқасида Про-Лигада иштирок этиши белгиланганди. Мутасаддиларга 2021 йил давомида клубнинг моддий-техник базасини яратиш, уни барча зарурий воситалар билан таъминлаш вазифалари юклатилиши белгиланганди.
Ушбу қарор муҳокамага қўйилганида жамоа 2021 йилги мавсумдан бошлаб Суперлигада иштирок этиши қайд этилганди. Бироқ қарорнинг ушбу банди кўплаб муҳокамаларга сабаб бўлди ва кейинчалик қарор матнига ўзгартириш киритилиб, «Арал» Про-Лигада ўйнаши белгиланди.
Мавзуга доир: Тарки одат амри маҳол: ўзбек футболи ва истиснолар
Про-Лига 2021 йилги мавсуми биринчи босқичидан кейин «Арал» 14 турда 13 очко тўплаб, саккиз жамоа ичида еттинчи ўринни эгаллади ва мусобақада қолиш учун курашадиган бўлди. Иккинчи босқичнинг икки туридан кейин «Арал» 14 очко билан тўрт жамоа орасида 3-ўринда бормоқда.
Изоҳ (0)