O‘zbekistonda 1 mln dollarlik yaxlit kupyura sotayotgan shaxs ushlandi

Davlat xavfsizligi xizmati bilan birgalikda o‘tkazilgan tadbirda 1 million AQSh dollari ko‘rinishidagi kupyurani sotayotgan firibgarlar ushlandi, deya xabar bermoqda Bosh prokuratura huzuridagi departament axborot xizmati.

Qayd etilishicha, departament hamda DXX tomonidan valyuta qimmatliklarining noqonuniy muomalaga kiritilishining oldini olish maqsadida tezkor tadbir o‘tkazilgan.

Unda fuqaro F.N. va I.P. oldindan til biriktirib, firibgarlik va ishonchini suiiste’mol qilish yo‘li bilan hech qanday qiymatga ega bo‘lmagan 1988-yilda ishlab chiqarilgan 1 000 000 AQSh dollari ko‘rinishidagi yaxlit kupyurani fuqaro U.ga 40 000 AQSh dollariga sotgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.