Тошкент шаҳар Халқ таълими бошқармаси пойтахтнинг Яшнобод туманидаги мактабларнинг бирига рўмол ўраб келган ўқувчи қизлар киритилмагани тўғрисида тарқалган хабарларга расмий муносабат билдирди.
Facebook ижтимоий тармоғида Яшнобод туманидаги 307-сонли ихтисослаштирилган давлат умумтаълим мактаби директори 4 нафар ўқувчи қизни рўмоли учун мактабдан ҳайдаб юборгани, эртага рўмолсиз, калта юбкада келса, мактабга киргизишини айтгани тўғрисида хабарлар тарқалди.
Пойтахт ХВБнинг маълум қилишича, мазкур ҳолат бўйича Яшнобод тумани халқ таълими бўлими ишчи гуруҳи томонидан ўрганиш олиб борилган ва якунда бу хабар ўз исботини топмаган.
«Мазкур умумтаълим муассасасида ўқувчи-қизлар Халқ таълими вазирлиги томонидан қўйилган талабларга мос ҳолда кийиниш маданиятига риоя қилишмоқда. Бундан ташқари, мактаб ҳудудида кийиниш маданиятига риоя қилмайдиган қизлар билан доимий равишда мактаб маъмурияти, жумладан, педагоглар томонидан, албатта, маданият ва одоб чегарасидан чиқмаган ҳолда суҳбатлар амалга оширилмоқда», — дейилади муносабатда.
Эслатиб ўтамиз, 4 сентябрь куни халқ таълими вазири бошчилигида 2021/2022-ўқув йили олдидан умумтаълим мактаблари директорлари, ўқитувчилар ва ота-оналар иштирокида ўтказилган очиқ мулоқотда Шерзод Шерматов ўқувчи қизларнинг мактабга рўмол ўраб келишига рухсат берилишини маълум қилганди.
Изоҳ (0)