Qashqadaryo viloyat Jinoyat sudida 2020-yilning 4-oktabr kuni bolta bilan chopib o‘ldirilgan chol-kampir o‘limida gumonlanganlar ustidan sud o‘z ishi boshladi. Sudda qatnashgan “Daryo” muxbirining xabar berishicha, sudya Botir Diyorov jarayonni yoritish istagida bo‘lgan jurnalist va blogerlarning video, foto hamda audiomaterial to‘plashiga to‘sqinlik qilgan.
“Sudyaga iltimosnoma kiritib, mazkur jarayon ijtimoiy tarmoqlarda bot-bot ko‘tarilayotganini aytsak-da, sudya Botir Diyorov jarayonda kuzatuvchi sifatida qatnashishimiz mumkinligini, biroq audio, foto hamda videomateriallar to‘plashimizga ruxsat bermasligini aytdi. Sababini so‘raganimizda esa tayinli asos keltirolmadi. Shuning uchun biz sud zalini tark etishga majbur bo‘ldik”, — deydi Effect.uz sayti muxbiri Davron Hasanov.
Sud zalida jarayonni kuzatib, ma’lumotlarni yon daftarchasiga yozib olishga majbur bo‘lgan “Daryo” muxbirining xabar berishicha, sudda chol-kampirning kelini Shalola Jo‘rayeva tinglangan.
Sudda so‘z olgan Shalola Jo‘rayeva 2020-yil 4-oktabr kunidagi voqeani esga olib, o‘sha kuni kechki payt bolasini emizib, yotib uxlaganini, birozdan so‘ng derazasining tagidan yugurib o‘tgan kishining oyoq tovushlari eshitilganini eslab:
“Avvaliga qaynotam bo‘lsa kerak deb o‘yladim, so‘ngra qaynotam keksa kishi bo‘lsa, qanday yuguradi deb o‘yladim. So‘ng jim bo‘ldi, keyin yotdim. Soatini bilmayman, birozdan so‘ng yana eshigim tortildi. Tashqaridan Shalola, Shalola, deb chaqirishdi. Turmush o‘rtog‘im uyda yo‘q edi. Chaqirgan odam erimmikin deb, sizmisiz, dedim. Indamadi-da, eshikni tortdi, eshik ochilib ketdi.
Bolam sovqotmasin deb, eshikni yopish uchun o‘rnimdan turdim. Eshik oldidagi ‘adyol’ni ko‘tarib, eshikni yopishga uringanimda kimdir boshimga mushtlab urdi, yiqilib tushdim. O‘rnimdan turganimda ikki yoshli bolamning qo‘lidan ushlab, boshi bilan yerga urayotgan ekan. Besh yil deganda farzandli bo‘lgandim. Bolamni urmang, dedim. Xo‘p, unda seni uramiz, deya yana meni urib ketdi. Meni urayotgan odamning ko‘zi va qoshi tanish bo‘lganidan kimligini bilish uchun yuzidagi ro‘molini tortdim. Qarasam, o‘zimizning Panji tog‘amiz ekan”, — dedi.
Shalola Jo‘rayevaning mazkur gaplariga e’tiroz bildirgan ayblanuvchi P.N. esa mazkur qotillik voqeasiga uning aloqasi yo‘qligini, IIB xodimlari uni urib, aybni uning bo‘yniga qo‘yishga harakat qilganini, tergov paytida unga bosim o‘tkazilib, qiynoqqa solinganini aytdi.
Shundan so‘ng sud qisqa tanaffus e’lon qildi.
Eslatib o‘tamiz, “Daryo”da Qashqadaryoda 66 yoshli chol va uning kampiri vahshiylarcha o‘ldirilib, yoqib yuborilgani, voqea bo‘yicha gumonlanuvchilar ozodlikda yurgani haqida xabar berilgandi. Shundan so‘ng mazkur maqolaga munosabat bildirgan Bosh prokuratura axborot xizmati vahshiylarcha o‘ldirilgan va yoqib yuborilgan chol-kampir voqeasi bo‘yicha 300 dan ortiq shaxs so‘roq qilinganini ochiqlab, natijalar haqida keng jamoatchilikka qo‘shimcha axborot berilishini bildirdi. Kuni kecha ijtimoiy tarmoqlarda chiqish qilgan ayol qotillikda gumonlanayotgan eri, qaynota va qaynog‘asi nohaq qamoqqa olinganini aytib, Prezidentdan yordam so‘radi. Mazkur chiqishga munosabat bildirgan Bosh prokuratura axborot xizmati esa holat yuzasidan Mirishkor tuman prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilganini, jinoyat ishi bo‘yicha uch nafar shaxsga ayb e’lon qilinib, ularga nisbatan qamoqqa olish tarzidagi ehtiyot chorasi qo‘llanilganini qo‘shimcha qilgandi.
Izoh (0)