Samarqand viloyati Oqdaryo tumanida 4-sinf o‘quvchisiga qo‘l ko‘targan maktab direktori o‘rinbosariga chora ko‘rildi. Bu haqda tuman Xalq ta’limi bo‘limi matbuot xizmati xabar berdi.
Ma’lum qilinishicha, tumandagi 53-maktabning 4-sinfda o‘qiyotgan N.B.ga maktabning o‘quv ishlari bo‘yicha direktor o‘rinbosari M.V. qo‘l ko‘targan. Jabrlanuvchining onasi bu haqda murojaat yo‘llagan.
Qayd etilishicha, Samarqand viloyati Xalq ta’limi boshqarmasi boshlig‘i o‘rinbosari O.Jangirov, tuman xalq ta’limi bo‘limi mudiri S.Ortiqova va boshqa mas’ullar ushbu holat bo‘yicha o‘rganish va tushuntirish ishlarini olib borgan. Shundan so‘ng direktor o‘rinbosari M.V.ga nisbatan intizomiy chora qo‘llanilib, o‘z vazifasidan ozod qilingan.
“Bu kabi holatlarning oldini olish maqsadida maktab jamoasi ishtirokida tushuntirish ishlari olib borilgan. Hozirda o‘quvchi va uning ota-onasi tomonidan hech qanday e’tirozlar yo‘qligini ma’lum qilamiz”, — deyiladi xabarda.
Bundan avval Samarqandda dars paytida oyog‘ini parta ustiga qo‘yib o‘tirgan maktab o‘quvchilarining ota-onalari jarimaga tortilgani, Jizzaxdagi maktablarning birida voyaga yetmagan o‘quvchi homilador ekanligi hamda Buxoroda o‘g‘rilikka qo‘l urgan maktab o‘quvchisiga sud hukmi o‘qilgani haqida xabar berilgandi.
Izoh (0)