O‘zbekistonning qaysi viloyatida qarindoshlar o‘rtasida nikoh tuzish holatlari ko‘proq ekanligi ma’lum bo‘ldi

O‘zbekistonda 2021-yilning iyul—sentabr oylarida FHDYo organlari tomonidan qarindosh bo‘lgan 675 nafar kelin-kuyovning nikohlari qayd qilindi. Bu haqda Davlat xizmatlari agentligi ma’lum qildi.

Qayd etilishicha, shundan 285 nafar kelin-kuyov bir-biriga nisbatan xolavachcha, 276 nafari tog‘avachcha va ammavachcha, 114 nafari esa amakivachcha hisoblanadi.

Eng ko‘p qarindoshlar o‘rtasida nikoh qayd qilingan hududlar Surxondaryo (268 ta), Qashqadaryo (179 ta) va Sirdaryo (40 ta) viloyatlari hissasiga to‘g‘ri keladi.

Eslatib o‘tamiz, Oila kodeksining 16-moddasiga asosan nasl-nasab shajarasi bo‘yicha to‘g‘ri tutashgan qarindoshlar o‘rtasida, tug‘ishgan va o‘gay aka-ukalar bilan opa-singillar o‘rtasida, shuningdek, farzandlikka oluvchilar bilan farzandlikka olinganlar o‘rtasida nikoh tuzish taqiqlanadi.

Mutaxassislar fikricha, yaqin qarindoshlar o‘rtasida nikoh yurak-qon tomir kasalliklarining tug‘ma turlari kelib chiqishiga sabab bo‘lmoqda.