Namangan viloyati IIB ijtimoiy tarmoqlarda ukasi huquq-tartibot organi xodimlari tomonidan sababsiz olib ketilgani bo‘yicha tarqalgan xabarlarga rasmiy munosabat bildirdi.
“Effect.uz” nashri Yangiqo‘rg‘on tumanida yashagan va ayni damlarda hibsda saqlanayotgan fuqaroning akasi tomonidan yo‘llangan murojaatni e’lon qilgan. Unda aka ukasi IIB xodimlari tomonidan nohaq olib ketilganini bildirgan.
Ma’lum qilinishicha, 2019-yil 11-iyun kuni Namangan viloyati IIB huzuridagi Tergov boshqarmasi tomonidan fuqaro S.A.ning Sh.I. va boshqalar xatti-harakatlaridan norozi bo‘lib yuborgan arizasi bo‘yicha to‘plangan hujjatlarga asosan Jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilgan.
Xususan, B.R., M.I., Sh.I. va boshqalar firibgarlik yo‘li bilan o‘zganing juda ko‘p miqdordagi mol-mulkini qo‘lga kiritish maqsadida bir guruh bo‘lib, “Shodlik” fermer xo‘jaligi rahbari S.A.ni aldagani aytilmoqda. Fuqaro Sh.I.ni Rossiyada mavjud bo‘lgan fermer xo‘jaligida ish yurituvchi bo‘lib ishlagani holda, aslida kim ekanini aniq bilib, uni Rossiya fuqarosi Q.S. deb tanishtirish orqali S.A.ga Rossiyadan dastlab 500 bosh, bankdan kredit mablag‘lari chiqarganidan so‘ng 1000 bosh arzon narxlarda naslli qoramol olib kelib berishlarini aytgan.
S.A.ning ishonchiga kirgan shaxslar undan 2018-yil sentabr—oktabr oylarida 135 ming dollar naqd pul shaklda olib, 2018-yil dekabr va 2019-yil yanvar oylarida bank orqali 538 450 dollar pul mablag‘larini Sh.I.ni Rossiyadagi hisobraqamiga o‘tkazish yo‘li bilan qo‘lga kiritgan. Ular S.A.ga yetkazib berilishi kerak bo‘lgan naslli qoramollarni yetkazmay, qoramollarni bir qismini o‘ziga tegishli bo‘lgan “Sultonbek Sabrina bog‘lari” fermer xo‘jaligiga olib kelib, boshqa fuqarolarga sotib, S.A. tomonidan naslli qoramol olish uchun berilgan pullarni shaxsiy ehtiyojlari yo‘lida sarflab yuborgan.
Sh.I. (S.Q.) va boshqalar qora mollarni yetkazib bermaganidan so‘ng, fuqaro S.A. ularning harakatlaridan norozi bo‘lib, 2019-yilda Uchqo‘rg‘on tumani IIB boshlig‘i nomiga ariza bilan murojaat qilgan.
Jinoyat ishi 2019-yil 15-iyulda IIV huzuridagi Tergov departamenti tomonidan ish yurituviga olinib, tergov harakatlari olib borilgan. Jinoyat ishi bo‘yicha G‘.I.ga nisbatan 24-iyulda Jinoyat kodeksining 168-moddasi (firibgarlik) 4-qismi “a” bandi bilan ayb e’lon qilinib, “qamoqqa olish” ehtiyot chorasi qo‘llanilgan.
2019-yil 13-avgust kuni M.I. va Sh.I.ga nisbatan Jinoyat kodeksining 168-moddasi 4-qismi “a” bandi bilan sirtdan ayb e’lon qilinib, “qamoqqa olish” tarzidagi ehtiyot chorasi qo‘llanilgan va qidiruv e’lon qilingan.
Dastlabki tergov davomida aka-uka I.lar tomonidan aslida S.A.ga yuborilishi lozim bo‘lgan qoramollarning bir qismi fuqaro B.R.ga jo‘natilgani aniqlangan. Ta’kidlanishicha, shartnomaga ko‘ra bank orqali Rossiyagi Sh.I. (S.Q.)ni hisobraqamiga qora mol sotib olish uchun o‘tkazib berilgan juda ko‘p miqdordagi pullardan 60 ming dollari B.R. rahbarlik qilayotgan “Sultonbek Sabrina bog‘lari” fermer xo‘jaligi hisobraqamiga o‘tkazib berilgan. Naqd shaklda berilgan juda ko‘p miqdordagi pullarning bir qismi B.R. tomonidan olingan, B.R. S.A.ga berilishi kerak bo‘lgan qoramollarni boshqa fuqarolarga ham sotib yuborgan.
2019-yil 11-oktabr kuni sirtdan ayblanuvchi va qidiruvda bo‘lgan M.I., Sh.I. hamda “Sultonbek Sabrina bog‘lari” fermer xo‘jaligi rahbari B.R. va bank mansabdor shaxslariga nisbatan bo‘lgan qismi Jinoyat kodeksining 168-moddasi 4-qismi “a” bandi bilan alohida ish yurituviga ajratilib, ayblanuvchi tariqasida jalb qilinishi lozim bo‘lgan shaxslar yashiringani sababli jinoyat ishi harakatdan to‘xtatilgan.
22-oktabr kuni G‘.I.ga nisbatan bo‘lgan jinoyat ishi Jinoyat-protsessual kodeksining 381-moddasi (jinoyat ishining prokurorga yuborilishi) talablari asosida ayblov xulosasi bilan tamomlanib, tegishli sudlovga yuborilgan va sud tomonidan G‘.I.ga nisbatan ozodlikdan mahrum qilish tariqasidagi jazo chorasi qo‘llanilgan.
2021-yil 19-yanvarda Tergov departamenti tomonidan M.I., Sh.I. va boshqalarga nisbatan bo‘lgan jinoyat ishi Namangan viloyat IIB huzuridagi Tergov boshqarmasiga yuborilgan.
Jinoyat ishi bo‘yicha “Sultonbek Sabrina bog‘lari” fermer xo‘jaligi rahbari B.R. Jinoyat kodeksining 168-moddasi 4-qismi “a” bandida ko‘rsatilgan jinoyatni sodir etganlikda gumon qilinuvchi tariqasida jalb qilinib, Jinoyat-protsessual kodeksning 221-moddasi tartibida ushlangan va qamoqqa olish tarzidagi ehtiyot chorasi qo‘llanilgan.
Olib borilgan tergov harakatlari davomida B.R. yuqorida qayd etilgan qonunbuzarliklarni sodir etgani o‘zi, guvohlar va jabrlanuvchilarning ko‘rsatmalari, yuzlashtirish bayonnomalari hamda tergov harakatlari davomida to‘plangan hujjatlar bilan tasdiqlangan. Shu sababli u Jinoyat kodeksining 168-moddasi 4-qismi “a” bandi bilan ayblanuvchi tariqasida jalb qilingan.
Jinoyat ishi bo‘yicha hozirda Namangan viloyati IIB huzuridagi Tergov boshqarmasi tomonidan tergov harakatlari olib borilmoqda, ish bo‘yicha qonuniy qaror qabul qilinishi ta’minlanadi.
Izoh (0)