Rossiya hukumati migrantlarga yordam beradigan notijorat “Tong Jahoni” tashkiloti rahbari Valentina Chupikni qo‘yib yubordi. “Gazeta.uz”ning yozishicha, bu haqda 2-oktabr kuni uning yordamchisi Aleksandr Kim “Novaya gazeta” va “Mediazona”ga ma’lum qildi.
Eslatib o‘tamiz, Rossiya Federal xavfsizlik xizmati uni 25-sentabrga o‘tar kechasi Sheremetyevo aeroportida hibsga oldi va qochqin deb tan olinishi uchun bila turib yolg‘on ma’lumot yoki soxta hujjatlar taqdim etish ayblovi bilan uni qochqinlik maqomidan mahrum qildi. Valentina Chupikning o‘zi bu ayblovni rad etdi. Unga 30 yil davomida Rossiyaga kirish taqiqlandi hamda u qochib ketgan O‘zbekistonga deportatsiya qilish ishlari boshlab yuborildi.
Aleksandr Kimning ma’lum qilishicha, 30-sentabr kuni O‘zbekiston konsulligi diplomatlari Valentina Chupikni O‘zbekistonga chiqarib yuborishni rasmiylashtirish uchun uning yoniga aeroportga keldi. Biroq uning advokatlari Valentina Chupik va onasi uchun Ukrainadan boshpana so‘radi.
O‘sha kun kechqurun Inson huquqlari bo‘yicha Yevropa sudi (IHES reglamenti)ning 39-qoidasini qo‘llab, Chupikni deportatsiya qilishni taqiqladi. Bu uni kamida 17-oktabrga qadar O‘zbekistonga deportatsiya qilish mumkin emasligini anglatardi.
Jurnalist Temur Varkaning so‘zlariga ko‘ra, o‘zbekistonlik diplomatlar uni Sheremetyevoda suratga olib “istalgan davlatga erkin chiqib ketishi” uchun unga tezda yangi xorijga chiqish pasportini (“zagranpasport”) berdi.
“O‘zbekiston Valentina Chupikka yangi ‘zagranpasport’ berdi. U hozirda bir soatcha oldin Yerevanga uchib ketgan samolyot bortida. Ular (Rossiya hukumati) boshqa uni ushlab tura olishmadi”, — degan huquq himoyachisi yordamchisi Aleksandr Kim.
Xabarda aytilishicha, ayni paytda Valentina Chupik Yerevanda (Armaniston). Deutsche Welle’ga bergan intervyusida u huquq himoyachiligini davom ettirishini bildirgan.
“Bir narsa aniq: men qayerda bo‘lmayin, inson huquqlari bilan shug‘ullanishda davom etaman. Ishoning, aynan muhojirlar va qochqinlarning huquqlari boshqalarga qaraganda ko‘proq buziladi. Hozircha Yerevanda qancha qolishimni ham ayta olmayman. Ehtimol, bu imkoniyatdan foydalanarman va arman sheriklarimiz bilan birgalikda bu yerda muhojirlar muammolariga bag‘ishlangan yana bir seminar o‘tkazarmiz”, — degan u.
Ma’lumot uchun, huquq himoyachisi Valentina Chupik Andijon voqealaridan keyin Rossiyaga ko‘chib ketgan. U ko‘p yillardan buyon Moskvada yashaydi va huquqni muhofaza qilish organlarining bosimi va boshqa muammolarga duch kelgan migrantlarga bepul yuridik yordam ko‘rsatadi.
Izoh (0)