Qashqadaryo viloyatining qo‘shni Turkmaniston bilan chegaradosh, viloyat markazidan 80 km uzoqlikda joylashgan Pomuq shaharchasida “Obod qishloq” va “Obod mahalla” davlat dasturi asosida bunyodkorlik va obodonlashtirish ishlari amalga oshirildi. Bu haqda “Daryo”ga ma’lum qilgan Mirishkor tuman hokimligi axborot xizmati rahbari Azizbek Yazdurdiyevning aytishicha, mazkur ishlar 20 kun muddatda amalga oshirilgan.
Ta’kidlanishicha, 18 ming aholi istiqomat qiluvchi shaharchada, asosan, turkman millatiga mansub fuqarolar, shuningdek, o‘zbek, tojik, tatar, qirg‘iz, rus va koreys millati vakillari istiqomat qiladi.
“Pomuq shaharchasi 1979-yilda tashkil etilgan sobiq Bahoriston tumanining markazi hisoblangan. 2003-yilda Bahoriston va Usmon Yusupov tumanlari birlashtirilib, yangi tashkil etilgan Mirishkor tumani tarkibiga kiritilgan. 2009-yilda Vazirlar Mahkamasi qaroriga asosan shaharcha maqomi berilgan. Shaharchada sobiq ittifoq davrida, shuningdek, mustaqillikning ilk yillarida qurilgan binolar mavjud bo‘lib, hozirgi kunga kelib ular ta’mirtalab, qarovsiz holga kelib qolgandi. Dastur asosida ‘Yangi qishloq’, ‘Pomuq’, ‘Bahoriston’, ‘Gulobod’, ‘Tinchlik’ va ‘Barhayot’ MFYlar hududidagi ta’mirtalab 62,4 kilometr yo‘lning 19,2 kilometri asfalt, 12,6 kilometri qum-shag‘al va 30,6 kilometri tuproqlanib ta’mirlandi”, — deydi Azizbek Yazdurdiyev.
Ma’lum bo‘lishicha, Pomuq shaharchasi hududida 1980—1981-yillarda qurilgan jami 15 ta ko‘p qavatli, 2 ta to‘rt qavatli va 13 ta ikki qavatli uy mavjud bo‘lib, to‘rt qavatli uylar ta’mirtalab holatga kelib qolgan.
“Dastur asosida uylar atrofida yo‘lakchalar qurildi, bolalar maydonchalari, o‘rindiqlar va tungi yoritish chiroqlari o‘rnatildi. Mahalliy budjet mablag‘lari hisobidan ko‘p qavatli uylarda isitish tizimini yo‘lga qo‘yish maqsadida ikki konturli isitish qozonlar o‘rnatish ishlari olib borilmoqda. Hududda uzoq vaqt davomida ichimlik suvi liniyalari orqali suv oqmasligi ham bir qancha muammolarni keltirib chiqargan. Shaharchadagi qurilish va ta’mirlash ishlari davomida ichimlik suvi tarmog‘i o‘tgan 28 ta ko‘chaga mahalliy budjet mablag‘lari hisobidan ko‘cha kolodeslari va suv o‘lchash asboblari o‘rnatilgan hamda 1160 ta xonadonga ichimlik suvi tarmog‘i kiritilgan”, — deydi hokimlik axborot xizmati rahbari.
Aytilishicha, Pomuq shaharchasidagi istirohat bog‘i va unda joylashgan stella hamda 1995-yilda Qarshi shahridan olib kelib o‘rnatilgan Motamsaro ona haykali ham qayta ta’mirlangan.
“Viloyat boshqarmalari va boshqa tashkilotlar tomonidan ixtiyoriy tashabbus asosida 58 ta xonadon joriy ta’mirlab berildi. Shuningdek, shaharcha markazidagi Pomuq madaniyat markazi 1984-yillarda qurilgan bo‘lib, 1990-yildan madaniyat markazi sifatida faoliyat yurita boshlagan. Mazkur bino dastur asosida qaytadan rekonstruksiya qilinib, bino ichida xoreografiya zali va kutubxona tashkil etildi hamda markazning faollar zalida zamonaviy holatga keltirildi”, — deydi Azizbek Yazdurdiyev.
Izoh (0)