Наманган вилояти ИИБ ижтимоий тармоқларда укаси ҳуқуқ-тартибот органи ходимлари томонидан сабабсиз олиб кетилгани бўйича тарқалган хабарларга расмий муносабат билдирди.
«Effect.uz» нашри Янгиқўрғон туманида яшаган ва айни дамларда ҳибсда сақланаётган фуқаронинг акаси томонидан йўлланган мурожаатни эълон қилган. Унда ака укаси ИИБ ходимлари томонидан ноҳақ олиб кетилганини билдирган.
Маълум қилинишича, 2019 йил 11 июнь куни Наманган вилояти ИИБ ҳузуридаги Тергов бошқармаси томонидан фуқаро С.А.нинг Ш.И. ва бошқалар хатти-ҳаракатларидан норози бўлиб юборган аризаси бўйича тўпланган ҳужжатларга асосан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган.
Хусусан, Б.Р., М.И., Ш.И. ва бошқалар фирибгарлик йўли билан ўзганинг жуда кўп миқдордаги мол-мулкини қўлга киритиш мақсадида бир гуруҳ бўлиб, «Шодлик» фермер хўжалиги раҳбари С.А.ни алдагани айтилмоқда. Фуқаро Ш.И.ни Россияда мавжуд бўлган фермер хўжалигида иш юритувчи бўлиб ишлагани ҳолда, аслида ким эканини аниқ билиб, уни Россия фуқароси Қ.С. деб таништириш орқали С.А.га Россиядан дастлаб 500 бош, банкдан кредит маблағлари чиқарганидан сўнг 1000 бош арзон нархларда наслли қорамол олиб келиб беришларини айтган.
С.А.нинг ишончига кирган шахслар ундан 2018 йил сентябрь—октябрь ойларида 135 минг доллар нақд пул шаклда олиб, 2018 йил декабрь ва 2019 йил январь ойларида банк орқали 538 450 доллар пул маблағларини Ш.И.ни Россиядаги ҳисобрақамига ўтказиш йўли билан қўлга киритган. Улар С.А.га етказиб берилиши керак бўлган наслли қорамолларни етказмай, қорамолларни бир қисмини ўзига тегишли бўлган «Султонбек Сабрина боғлари» фермер хўжалигига олиб келиб, бошқа фуқароларга сотиб, С.А. томонидан наслли қорамол олиш учун берилган пулларни шахсий эҳтиёжлари йўлида сарфлаб юборган.
Ш.И. (С.Қ.) ва бошқалар қора молларни етказиб бермаганидан сўнг, фуқаро С.А. уларнинг ҳаракатларидан норози бўлиб, 2019 йилда Учқўрғон тумани ИИБ бошлиғи номига ариза билан мурожаат қилган.
Жиноят иши 2019 йил 15 июлда ИИВ ҳузуридаги Тергов департаменти томонидан иш юритувига олиниб, тергов ҳаракатлари олиб борилган. Жиноят иши бўйича Ғ.И.га нисбатан 24 июлда Жиноят кодексининг 168-моддаси (фирибгарлик) 4-қисми «а» банди билан айб эълон қилиниб, «қамоққа олиш» эҳтиёт чораси қўлланилган.
2019 йил 13 август куни М.И. ва Ш.И.га нисбатан Жиноят кодексининг 168-моддаси 4-қисми «а» банди билан сиртдан айб эълон қилиниб, «қамоққа олиш» тарзидаги эҳтиёт чораси қўлланилган ва қидирув эълон қилинган.
Дастлабки тергов давомида ака-ука И.лар томонидан аслида С.А.га юборилиши лозим бўлган қорамолларнинг бир қисми фуқаро Б.Р.га жўнатилгани аниқланган. Таъкидланишича, шартномага кўра банк орқали Россияги Ш.И. (С.Қ.)ни ҳисобрақамига қора мол сотиб олиш учун ўтказиб берилган жуда кўп миқдордаги пуллардан 60 минг доллари Б.Р. раҳбарлик қилаётган «Султонбек Сабрина боғлари» фермер хўжалиги ҳисобрақамига ўтказиб берилган. Нақд шаклда берилган жуда кўп миқдордаги пулларнинг бир қисми Б.Р. томонидан олинган, Б.Р. С.А.га берилиши керак бўлган қорамолларни бошқа фуқароларга ҳам сотиб юборган.
2019 йил 11 октябрь куни сиртдан айбланувчи ва қидирувда бўлган М.И., Ш.И. ҳамда «Султонбек Сабрина боғлари» фермер хўжалиги раҳбари Б.Р. ва банк мансабдор шахсларига нисбатан бўлган қисми Жиноят кодексининг 168-моддаси 4-қисми «а» банди билан алоҳида иш юритувига ажратилиб, айбланувчи тариқасида жалб қилиниши лозим бўлган шахслар яширингани сабабли жиноят иши ҳаракатдан тўхтатилган.
22 октябрь куни Ғ.И.га нисбатан бўлган жиноят иши Жиноят-процессуал кодексининг 381-моддаси (жиноят ишининг прокурорга юборилиши) талаблари асосида айблов хулосаси билан тамомланиб, тегишли судловга юборилган ва суд томонидан Ғ.И.га нисбатан озодликдан маҳрум қилиш тариқасидаги жазо чораси қўлланилган.
2021 йил 19 январда Тергов департаменти томонидан М.И., Ш.И. ва бошқаларга нисбатан бўлган жиноят иши Наманган вилоят ИИБ ҳузуридаги Тергов бошқармасига юборилган.
Жиноят иши бўйича «Султонбек Сабрина боғлари» фермер хўжалиги раҳбари Б.Р. Жиноят кодексининг 168-моддаси 4-қисми «а» бандида кўрсатилган жиноятни содир этганликда гумон қилинувчи тариқасида жалб қилиниб, Жиноят-процессуал кодекснинг 221-моддаси тартибида ушланган ва қамоққа олиш тарзидаги эҳтиёт чораси қўлланилган.
Олиб борилган тергов ҳаракатлари давомида Б.Р. юқорида қайд этилган қонунбузарликларни содир этгани ўзи, гувоҳлар ва жабрланувчиларнинг кўрсатмалари, юзлаштириш баённомалари ҳамда тергов ҳаракатлари давомида тўпланган ҳужжатлар билан тасдиқланган. Шу сабабли у Жиноят кодексининг 168-моддаси 4-қисми «а» банди билан айбланувчи тариқасида жалб қилинган.
Жиноят иши бўйича ҳозирда Наманган вилояти ИИБ ҳузуридаги Тергов бошқармаси томонидан тергов ҳаракатлари олиб борилмоқда, иш бўйича қонуний қарор қабул қилиниши таъминланади.
Изоҳ (0)