Россия ҳукумати мигрантларга ёрдам берадиган нотижорат «Тонг Жаҳони» ташкилоти раҳбари Валентина Чупикни қўйиб юборди. «Gazeta.uz»нинг ёзишича, бу ҳақда 2 октябрь куни унинг ёрдамчиси Александр Ким «Новая газета» ва «Медиазона»га маълум қилди.
Эслатиб ўтамиз, Россия Федерал хавфсизлик хизмати уни 25 сентябрга ўтар кечаси Шереметьево аэропортида ҳибсга олди ва қочқин деб тан олиниши учун била туриб ёлғон маълумот ёки сохта ҳужжатлар тақдим этиш айблови билан уни қочқинлик мақомидан маҳрум қилди. Валентина Чупикнинг ўзи бу айбловни рад этди. Унга 30 йил давомида Россияга кириш тақиқланди ҳамда у қочиб кетган Ўзбекистонга депортация қилиш ишлари бошлаб юборилди.
Александр Кимнинг маълум қилишича, 30 сентябрь куни Ўзбекистон консуллиги дипломатлари Валентина Чупикни Ўзбекистонга чиқариб юборишни расмийлаштириш учун унинг ёнига аэропортга келди. Бироқ унинг адвокатлари Валентина Чупик ва онаси учун Украинадан бошпана сўради.
Ўша кун кечқурун Инсон ҳуқуқлари бўйича Европа суди (IHES регламенти)нинг 39-қоидасини қўллаб, Чупикни депортация қилишни тақиқлади. Бу уни камида 17 октябрга қадар Ўзбекистонга депортация қилиш мумкин эмаслигини англатарди.
Журналист Темур Варканинг сўзларига кўра, ўзбекистонлик дипломатлар уни Шереметьевода суратга олиб «исталган давлатга эркин чиқиб кетиши» учун унга тезда янги хорижга чиқиш паспортини («загранпаспорт») берди.
«Ўзбекистон Валентина Чупикка янги ‘загранпаспорт’ берди. У ҳозирда бир соатча олдин Ереванга учиб кетган самолёт бортида. Улар (Россия ҳукумати) бошқа уни ушлаб тура олишмади», — деган ҳуқуқ ҳимоячиси ёрдамчиси Александр Ким.
Хабарда айтилишича, айни пайтда Валентина Чупик Ереванда (Арманистон). Deutsche Welle’га берган интервьюсида у ҳуқуқ ҳимоячилигини давом эттиришини билдирган.
«Бир нарса аниқ: мен қаерда бўлмайин, инсон ҳуқуқлари билан шуғулланишда давом этаман. Ишонинг, айнан муҳожирлар ва қочқинларнинг ҳуқуқлари бошқаларга қараганда кўпроқ бузилади. Ҳозирча Ереванда қанча қолишимни ҳам айта олмайман. Эҳтимол, бу имкониятдан фойдаланарман ва арман шерикларимиз билан биргаликда бу ерда муҳожирлар муаммоларига бағишланган яна бир семинар ўтказармиз», — деган у.
Маълумот учун, ҳуқуқ ҳимоячиси Валентина Чупик Андижон воқеаларидан кейин Россияга кўчиб кетган. У кўп йиллардан буён Москвада яшайди ва ҳуқуқни муҳофаза қилиш органларининг босими ва бошқа муаммоларга дуч келган мигрантларга бепул юридик ёрдам кўрсатади.
Изоҳ (0)