Chirchiq shahar hokimligi Ma’naviyat bo‘linmasi tashabbusi bilan o‘zbek tilida to‘g‘ri yozilgan, doimo zaruriy ehtiyojda bo‘lgan so‘z va nomlanishlarni kichik formatdagi flayerlarga chiqarib, eng qulay joylarga, xususan, jamoat joylari, do‘konlar, o‘quv yurtlari, jamoat transportlari va boshqa shu kabi aholi gavjum bo‘ladigan obyektlarda joylashtirish chelenjiga start berildi. Bu ijtimoiy tarmoqlarda keng bahs-munozaralarga sabab bo‘lgach, hokimlik holatga munosabat bildirdi.
Unda aytilishicha, o‘zbek tilida so‘zlashuvchi aholining tilda bor bo‘lgan muqobil so‘zlardan to‘g‘ri va o‘rinli foydalanish targ‘ib qilindi. Shu maqsadda shaharda turli tillarda so‘zlashuvchi aholi vakillari uchun 21-oktabr — O‘zbek tili bayrami kuniga bag‘ishlab targ‘ibot vositalari tayyorlanib, tarqatildi.
“Ularda bugun aholi orasida kundalik muloqotlarda ko‘p ishlatilayotgan o‘zlashtirma so‘zlarning o‘zbek tilidagi muqobilini topish va ishlatishga ko‘maklashish maqsad qilingan. Bu nafaqat boshqa tillarda, balki davlat tilida muloqot qiluvchilarning o‘zbek tilida aniq va bexato so‘zlashga o‘ziga xos bir da’vatdir.
Zotan ma’naviy-ma’rifiy targ‘ibotning ta’sirchan uslublaridan keng va samarali foydalanish, yuqorida nomi tilga olingan markaz va uning bo‘linmalarining vazifasi hisoblanadi.
Tilimiz sofligini saqlash, davlat tilining rasmiy maqomini mustahkamlash maqsadida qilinayotgan bunday ma’rifiy-targ‘ibot ishlariga boshqacha tus bermaslik, aksincha qo‘llab-quvvatlash maqsadga muvofiqdir.
Shu ma’noda ijtimoiy tarmoqlardagi ‘Chirchiq rasmiy’ kanali orqali chiqishlarida bu holatdan norozilik kayfiyatini bildirayotgan fuqarolarga tarqatilayotgan materiallarda hech bir tilni kamsitish kabi boshqa maqsadlar yo‘qligini, bu tilimiz sofligini buzayotgan ayrim ajnabiy so‘zlarning davlat tilidagi muqobili borligini eslatish va undan foydalanishga xayrli bir da’vat ekanligini eslatamiz”, — deyiladi hokimlik munosabatida.
Eslatib o‘tamiz, 1-iyul kuni bosh vazir Abdulla Aripov barcha vazirliklar, idoralar va tashkilotlar, shuningdek, Qoraqalpog‘iston Vazirlar kengashi, Toshkent va viloyatlar hokimliklariga lotin yozuviga asoslangan o‘zbek alifbosiga o‘tishni tezlashtirish bo‘yicha topshiriq berdi.
Vazirlar Mahkamasining 2021-yil 10-fevraldagi qarori bilan lotin alifbosiga to‘liq bosqichma-bosqich o‘tish bo‘yicha “yo‘l xaritasi” tasdiqlangan edi. Unga ko‘ra, hozirda kirill alifbosida yuritiladigan barcha joy va ko‘cha nomlari, atamalar, tashkilotlarning nomlari, peshlavhalar, ommaviy targ‘ibot vositalari, reklama va e’lonlar, ish qog‘ozlari va turli blanklar 2022-dekabriga qadar lotin grafikasiga o‘tkazilishi belgilangan.
Izoh (0)