Чирчиқ шаҳар ҳокимлиги Маънавият бўлинмаси ташаббуси билан ўзбек тилида тўғри ёзилган, доимо зарурий эҳтиёжда бўлган сўз ва номланишларни кичик форматдаги флаерларга чиқариб, энг қулай жойларга, хусусан, жамоат жойлари, дўконлар, ўқув юртлари, жамоат транспортлари ва бошқа шу каби аҳоли гавжум бўладиган объектларда жойлаштириш челенжига старт берилди. Бу ижтимоий тармоқларда кенг баҳс-мунозараларга сабаб бўлгач, ҳокимлик ҳолатга муносабат билдирди.
Унда айтилишича, ўзбек тилида сўзлашувчи аҳолининг тилда бор бўлган муқобил сўзлардан тўғри ва ўринли фойдаланиш тарғиб қилинди. Шу мақсадда шаҳарда турли тилларда сўзлашувчи аҳоли вакиллари учун 21 октябрь — Ўзбек тили байрами кунига бағишлаб тарғибот воситалари тайёрланиб, тарқатилди.
«Уларда бугун аҳоли орасида кундалик мулоқотларда кўп ишлатилаётган ўзлаштирма сўзларнинг ўзбек тилидаги муқобилини топиш ва ишлатишга кўмаклашиш мақсад қилинган. Бу нафақат бошқа тилларда, балки давлат тилида мулоқот қилувчиларнинг ўзбек тилида аниқ ва бехато сўзлашга ўзига хос бир даъватдир.
Зотан маънавий-маърифий тарғиботнинг таъсирчан услубларидан кенг ва самарали фойдаланиш, юқорида номи тилга олинган марказ ва унинг бўлинмаларининг вазифаси ҳисобланади.
Тилимиз софлигини сақлаш, давлат тилининг расмий мақомини мустаҳкамлаш мақсадида қилинаётган бундай маърифий-тарғибот ишларига бошқача тус бермаслик, аксинча қўллаб-қувватлаш мақсадга мувофиқдир.
Шу маънода ижтимоий тармоқлардаги ‘Чирчиқ расмий’ канали орқали чиқишларида бу ҳолатдан норозилик кайфиятини билдираётган фуқароларга тарқатилаётган материалларда ҳеч бир тилни камситиш каби бошқа мақсадлар йўқлигини, бу тилимиз софлигини бузаётган айрим ажнабий сўзларнинг давлат тилидаги муқобили борлигини эслатиш ва ундан фойдаланишга хайрли бир даъват эканлигини эслатамиз», — дейилади ҳокимлик муносабатида.
Эслатиб ўтамиз, 1 июль куни бош вазир Абдулла Арипов барча вазирликлар, идоралар ва ташкилотлар, шунингдек, Қорақалпоғистон Вазирлар кенгаши, Тошкент ва вилоятлар ҳокимликларига лотин ёзувига асосланган ўзбек алифбосига ўтишни тезлаштириш бўйича топшириқ берди.
Вазирлар Маҳкамасининг 2021 йил 10 февралдаги қарори билан лотин алифбосига тўлиқ босқичма-босқич ўтиш бўйича «йўл харитаси» тасдиқланган эди. Унга кўра, ҳозирда кирилл алифбосида юритиладиган барча жой ва кўча номлари, атамалар, ташкилотларнинг номлари, пешлавҳалар, оммавий тарғибот воситалари, реклама ва эълонлар, иш қоғозлари ва турли бланклар 2022 декабрига қадар лотин графикасига ўтказилиши белгиланган.
Изоҳ (0)