Дурдона Нишонбоева иккинчи фарзандини дунёга келтириши арафасида шифокорлар унга оғир бир хабарни етказган — бола юрак нуқсони билан туғилади ва, катта эҳтимол билан, яшаб кетолмайди. «Бундай гапни эшитиш жуда ёмон бўларкан, ёмон аҳволга тушганман», — дея тан олади она. Ҳаётга, яшашга интилиши кучли бола туғилган, юрагида бир марта жарроҳлик амалиётини ҳам ўтказган.
Аммо боланинг аҳволи янада яхшиланиши учун иккинчи операцияни ҳам ўтказиш зарур эди. Шу боис она ва болани Республика ихтисослаштирилган жарроҳлик илмий-амалий тиббиёт маркази (халқ тирида «Грудной»)га юборишган. Марказ мутахассислари бола кучга тўлиши, ҳеч бўлмаса уч ёш бўлиши кераклигини, йўқса операцияни кўтара олмаслигини тушунтириб, охирида: «Имкониятингиз бўлса, Ҳиндистонга олиб боринг», деб таклиф қилган.
Дурдонанинг оиласида бундай имконият йўқ эди. Аммо айни шу вақтда Ўзбекистонда у каби турмушда қийналган аёлларнинг мушкулини осон қилишда ўрни катта бўлган «Аёллар дафтари» жорий қилиниб, ёрдамга муҳтож аёлларнинг рўйхатлари шакллантирила бошланган эди. Дурдона Нишонбоева ҳам маҳалла орқали ушбу «дафтар»га киритилди ва ўғлининг иккинчи операцияси учун зарур бўлган маблағ шу «дафтар» орқали тўлаб берилди.
«Тўғриси, иккинчи операциясида роса қўрқдим. Шифокорлар бола тирик чиқмаслиги ҳам мумкинлиги, бир ёғи Худодан эканини айтганди. Йўқ, кейин жарроҳ ҳам операциядан хурсанд чиқди. Ўша лаҳзада мендан бахтли одам йўқ эди, чунки менга боламни қайтариб беришди. Президент ташаббуси билан ‘Аёллар дафтари’ очилгани, аёлларга шунчалик ёрдам кўрсатилгани сабаб болам шу ҳолатга келди», — дейди миннатдорлик билан она.
«Аёллар дафтари» ҳақида
2020 йил августида Президент Шавкат Мирзиёев ишсиз ёшлар учун «Ёшлар дафтари», ишсиз аёллар ёки боқувчисиз қолган оилалар учун «Аёллар дафтари»ни жорий этишни таклиф қилган эди. Бундан аввалроқ ёрдамга муҳтож эҳтиёжманд оилалар ҳақидаги ахборотни ўзида жамлаган «Темир дафтар» рўйхати жорий этилган эди.2021 йил январида «Аёллар дафтари» тушунчаси қонунчиликда ўз аксини топди. Бунда ушбу рўйхатга кимлар киритилиши, шунингдек, рўйхатга киритилган аёлларга кўрсатиладиган ёрдам турлари белгилаб қўйилди. Хусусан, ушбу рўйхатга киритилган аёлларга тадбиркорлик фаолиятини йўлга қўйиши учун базавий ҳисоблаш миқдорининг 150 баробари (36,75 миллион сўм)гача бўлган миқдорда кредитлар берилади.
Ўзбекистон президентлигига Халқ демократик партиясидан кўрсатилган номзод Мақсуда Ворисова UzReport телеканалига берган интервьюсида «...‘Аёллар дафтари’ яхши ташаббус бўлгани, бироқ уни жойларда тўғри тушуниб, ишни тўғри ташкил қилишганми, деган саволлар очиқ қолгани» ҳақида фикр билдирган.
Бунга жавобан амалдаги президент (айни вақтда ЎзЛиДеПдан президентликка кўрсатилган номзод) Шавкат Мирзиёев, жумладан, шундай деди: «Бир хиллар чиқиб айтяпти, ‘Темир дафтар’ нотўғри бўлди, ‘Аёллар дафтари’ нотўғри бўлди... Агар у дафтар бўлмаганда, коронавирусда кимга берардик ёрдамни? Агар ‘Темир дафтар’ бўлмаганида, у бечора оилага ким бориб қарарди?».
Изоҳ (0)