Сувости кемалари билан боғлиқ келишмовчиликдан кейин Парижга чақириб олинган Франциянинг АҚШдаги элчиси Филипп Этьен Вашингтонга қайтди. Аввалроқ Франция президенти Эммануэль Макрон дипломат АҚШга 29 сентябрда қайтишини айтганди.
Франция элчихонаси вакилининг AFP’га маълум қилишича, Филипп Этьен 29 сентябрь куни тушдан кейин Вашингтондаги Даллес аэропортига етиб келган.
Сентябрь ойининг ўрталарида АҚШ, Австралия ва Буюк Британия AUKUS альянси тузилганини эълон қилди, унда Австралияни Американинг атом сувости кемалари билан жиҳозлаш назарда тутилган. Натижада Австралия Франциянинг Naval Group ҳарбий кемасозлик компанияси билан тузган рекорд даражада қиммат шартномани тўхтатди.
Австралия уни 2016 йилда имзолаган, шартнома 12 та оддий сувости кемасини қуришни назарда тутган. Лойиҳага 90 миллиард Австралия доллари (66 миллиард АҚШ доллари) талаб қилиниб, бу шартнома Австралия денгиз флоти тарихидаги энг қиммати бўларди.
Франция ташқи ишлар вазири Жан-Ив Ле Дриан шартноманинг бекор қилинишини «орқадан пичоқ уриш» деб атаган. Шунингдек, бекор бўлган шартнома туфайли Франция АҚШ билан бирга Чесапик денгиз жангининг 240 йиллигига бағишланган тантаналарни нишонлашдан бош тортган.
18 сентябрь куни Франция ташқи ишлар вазири Жан-Ив Ле Дриан АҚШ ва Австралиядаги элчиларини маслаҳатлашувлар учун Парижга чақириб олаётгани ҳақида хабар берилди. 22 сентябрь куни эса Эммануэль Макрон Филипп Этьенга Вашингтонга қайтишни буюрди.
28 сентябрь куни Макрон Франция элчиси «янги мажбуриятлар шартларини белгилаш учун музокаралар ўтказиш ҳақидаги аниқ топшириқ билан» Вашингтонга қайтишини эълон қилди. Давлат раҳбари, шунингдек, октябрь ойида АҚШ президенти Жо Байден билан мамлакатлар ўртасидаги муносабатларни муҳокама қилиш ниятида эканини айтди.
Изоҳ (0)