Toyota kompaniyasi o‘zining yangi Tundra pikapini qattiq sinovdan o‘tkazdi — mashina kuzoviga to‘rt metr balandlikda 227 kilogrammli yuk tashlangan. Bu kabi test kuzovning yangi SMC kompozitdan qoplamasini reklama qilishi kerak, deb xabar beradi Motor.
Toyota reklama maqsadida yangi Tundra kuzoviga qutidagi dvigatelni tashladi va kompozit platforma zarbga bardosh berdi. Bir qarashda stress-test mashina romining deformatsiyasiga yoki “podveska”siga zarar yetkazmagandek, biroq pikapning sinovdan keyingi suratlari e’lon qilinmagan.
Yapon avtomobil ishlab chiqaruvchisi uchun kompozit kuzovning mustahkamligini tasdiqlash muhim ahamiyatga ega bo‘lgan, chunki to‘liq o‘lchamli pikaplar uchun bu yangi texnologiya hisoblanadi. Faqatgina GMC Sierra ko‘p komponentli materiallardan ishlangan kuzovni taqdim etadi, qolgan Amerika pikaplarining platformasi an’anaviy po‘lat va alyuminiy qotishmalaridan ishlangan. Yuk platformalarining stress-testlarini bunga qadar Chevrolet va Honda ham o‘tkazgan — reklama maqsadida kuzovga shlakoblok va katta toshlar otilgandi.
Yangi Toyota Tundra asosiy texnik tavsiflari bo‘yicha raqobatchilaridan qolishmaydi, modelning savdolari boshlang‘ich narxiga bog‘liq bo‘ladi. Amerikalik jurnalistlarning taxminicha, gibrid bo‘lmagan dvigatel va standart g‘ildiraklar bazasi uzunligiga ega pikapning narxi 36 ming dollardan boshlanadi.
Eslatib o‘tamiz, 2020-yilning noyabrida Volvo kompaniyasi ekstremal krash-test o‘tkazib, uning davomida o‘nlab avtomobillarini 30 metr balandlikda yerga tashlagandi.
Izoh (0)