Turkmaniston parlamenti prezident Gurbanguli Berdimuhamedovni ikkita medal bilan taqdirladi – birinchisi “Jasur turkman” (Türkmen edermen) medali, ikkinchisi mamlakat mustaqilligining 30 yilligi sharafiga “Mustaqil Turkman yurtining himoyachisi” (Garashsyz Turkmenistanyň Watan goragçysy) yubiley medali. Bu haqda Turkmanistonning “Oltin asr” davlat gazetasi xabar berdi.
“Vatanimizning mudofaa qudratini mustahkamlashda erishilgan yuqori darajalar, ulkan yutuqlar meni jasur xalqimizning baxtli va farovon hayoti yo‘lida kuch va energiyamni ayamay, tinimsiz mehnat qilishga majbur qiladi”, — deb yozadi Berdimuhamedov.
Taqdirlash marosimida Berdimuhamedov “ochiq eshiklar” siyosatini yuritayotganini va Turkmaniston manfaatlari uchun barcha davlatlar bilan yaxshi aloqada ekanini aytdi. Uning ta’kidlashicha, mamlakat o‘z mustaqilligini, mudofaa qobiliyatini va qonun ustuvorligini mustahkamlashi va himoya qilishi kerak.
Berdimuhamedov, o‘z navbatida, mudofaa vaziri Begench Gundogdiyev, ichki ishlar vaziri Ovezdurdi Xodjiyazov, bosh prokuror Botir Atdayev, Oliy sud raisi Quvonchmurod Ussanepesov, milliy xavfsizlik vaziri Qurbonmurod Annayev, Prezident xavfsizlik xizmati rahbari Davlatgeldi Meredov va boshqalarni “Mustaqil Turkman yurtining himoyachisi” medallari bilan taqdirladi. Berdimuhamedov mukofotlarni mamlakat mustaqilligining 30 yilligi sharafiga bag‘ishlangan harbiy parad a’lo darajada o‘tkazilgani uchun topshirdi.
Turkmanistonda Mustaqillik kuni 27-sentabr kuni nishonlanadi.
Avvalroq Gurbanguli Berdimuhamedov, Vazirlar Mahkamasi a’zolari va parlament raisi mustaqillikni mustahkamlashdagi xizmatlari uchun bir-birlarini “Türkmenistanyň Garaşsyzlygynyň 30 ýyllygyna” (Turkmaniston mustaqilligining 30 yilligiga”) medallari va “Altyn şaý” esdalik tangalari bilan taqdirlagan edi.
Izoh (0)