Niderlandiya hukumati mamlakat bosh vaziri vazifasini bajaruvchi Mark Ryutte go‘yoki Marokash mafiyasi a’zolari tomonidan kuzatilganidan keyin uni qo‘riqlash choralarini kuchaytirdi. Bu haqda mahalliy De Telegraaf nashri o‘z manbalariga asoslanib xabar berdi.
Nashr suhbatdoshlarining ta’kidlashicha, yollanma qotillar hujumidan oldin zarur tafsilotlarni to‘playdigan “kuzatuvchilar” Ryuttening ortidan tushgan bo‘lishi mumkin.
Avvalroq bosh vazir Gaaga shahri bo‘ylab velosipedda sayohat qilgan. Endi Qirollik va Diplomatik Xavfsizlik xodimlari uni “qat’iy” — “ko‘rinarli va ko‘rinmas” xavfsizlik choralari bilan ta’minladi, deb yozadi De Telegraaf.
Hukumat axborot xizmati ko‘rilgan choralar haqida izoh berishdan bosh tortdi. “Biz xavfsizlikning hozirgi holati va uni ta’minlash uchun ko‘rilgan choralar haqida hech qachon bayonot bermaymiz”, — dedi xizmat vakili. De Telegraaf, shuningdek, Xavfsizlik va terrorizmga qarshi kurash milliy koordinatoridan ham rasmiy izoh ololmadi.
Nashrning ta’kidlashicha, Niderlandiyada jinoyatchilardan olingan avvalgi xabarlar tufayli hukumatning mafiyadan himoya qilishiga umid qilayotgan “odamlarning uzun navbati” shakllangan. Ular orasida huquqshunoslar, sudyalar, advokatlar, jurnalistlar va ularning oila a’zolari bor. De Telegraaf’ga intervyu bergan sud ekspertlari mafiya guruhlari jamiyatni qo‘rqitishga va beqarorlashtirishga intilayotganini qayd etdi.
Ekspertlar avvalroq Niderlandiyada advokat Dark Versum va jurnalist Piter de Frizaga hujum uyushtirilganini eslatdi. Jurnalistga hujumdan oldin ham tahdidlar bo‘lib turgan.
Mark Ryutte 2010-yildan buyon Niderlandiya bosh vaziri lavozmini egallab keladi. 2021-yilda uning partiyasi parlament saylovlarida g‘alaba qozondi.
Izoh (0)