Jons Hopkins universiteti ma’lumotlariga ko‘ra, dunyoda koronavirusga chalinganlar soni 232 800 601 kishiga yetdi, shularning 4 765 604 nafari vafot etgan. Shuningdek, jahon bo‘yicha 6,152 milliarddan ortiq dozada koronavirusga qarshi vaksinalar qo‘llanilgan.
Kasallanganlar soni bo‘yicha AQSh (43,2 million), Hindiston (33,7 million), Braziliya (21,3 million), Buyuk Britaniya (7,7 million) va Rossiya (7,3 million) eng oldinda bormoqda.
Bayden koronavirusga qarshi vaksinaning uchinchi dozasini oldi
AQSh prezidenti Jo Bayden koronavirusga qarshi vaksinaning uchinchi — buster dozasini oldi. Vaksinatsiya jarayoni Baydenning Twitter’dagi sahifasi orqali bevosita translyatsiya qilindi.“Hozir men COVID-19 ga qarshi buster ukolni olaman va kimga tavsiya etilgan bo‘lsa, barchani xuddi shunday qilishga da’vat etaman”, — deb yozdi 78 yoshli AQSh prezidenti emlanishdan avval.
Shuningdek, Bayden o‘z murojaatida qayd etishicha, Pfizer vaksinasi bilan to‘liq emlangan amerikaliklarning ko‘pchiligi yarim yildan keyin u kabi qayta emlanishi mumkin. Xususan, ushbu tavsiya semizlik va diabet kabi surunkali kasalliklari bo‘lgan 18 yoshdan oshgan fuqarolarga (shu jumladan, 64 yoshdan kattalarga) hamda tibbiyot xodimlari, o‘qituvchilar va sotuvchilar kabi odamlar bilan eng ko‘p muloqot qiluvchilarga tegishlidir. Ushbu guruh 60 million amerikalikni o‘z ichiga oladi, dedi Bayden.
Turkmanistonga faqat emlangan xorijliklar kiritiladi
Turkmaniston Kasalliklar tarqalishiga qarshi kurash bo‘yicha favqulodda komissiyasi qaroriga muvofiq, mamlakat hududiga kirayotgan barcha chet elliklar quyidagi hujjatlarni taqdim etishi kerak:- PZR-testdan o‘tganlik haqida ma’lumotnoma (amal qilish muddati 72 soat);
- COVID-19 ga qarshi to‘liq emlangani haqidagi sertifikat yoki koronavirusga qarshi antitanalar borligi haqida ma’lumotnoma (IgM, IgG).
Ushbu yangilik 28-sentabr kuni Rossiyaning Ashxoboddagi elchixonasi saytiga joylashtirilgan. Davlat axborot agentligi komissiya majlisi haqida xabar bermagan. 26-sentabrdan boshlab mamlakatda Turkmaniston mustaqilligining 30 yilligiga bag‘ishlangan ommaviy tantanalar bo‘lib o‘tmoqda.
Mavzuga doir: Turkmaniston fuqarolari JSSTga murojaat qilib, hukumatga koronavirusni tan oldirishni so‘radi
Rossiyada COVID-19 ga qarshi yangi vaksina sinovlari boshlandi
Rossiyada koronavirusga qarshi yangi vaksina — “Betuvaks-Kov-2” sinovlari boshlandi.Dori vositalari davlat reyestri ma’lumotlariga ko‘ra, Rossiyada ushbu vaksinani klinik sinovlardan o‘tkazishga 27-sentabr kuni ruxsat berilgan. U koronavirus “profilaktikasi uchun rekombinant vaksina”dir.
Vaksina Moskvadagi “Betuvaks” MChJ ekspertlari tomonidan ishlab chiqilgan. Yangi tibbiyot texnologiyalari instituti suspenziya ishlab chiqaruvchisiga aylandi.
“Betuvaks” klinik sinovlarining birinchi va ikkinchi bosqichlari 2022-yil avgusti oxirigacha davom etishi taxmin qilinmoqda. Tadqiqotlarda 170 kishi qatnashadi. Sinovlardan maqsad “Betuvaks-kov-2”ni voyaga yetgan sog‘lom ko‘ngillilarda xavfsizlik, qabul qilinishi va immunitet hosil qilishi nuqtai nazaridan tekshirishdan iborat.
Shu paytgacha Rossiyada koronavirusga qarshi beshta vaksina ro‘yxatga olingan, bular — “Sputnik V” va “Sputnik Layt”, “EpiVakKorona” va “EpiVakKorona-N” hamda “KoviVak” preparatlari.
COVID-19 pandemiyasi qachon tugaydi?
Koronavirus pandemiyasi yaqin kelajakda o‘z nihoyasiga yetmaydi. Ma’lum bir holatlarda kasallanish darajasi pasayib, virus mavsumiy bo‘lib qolsa-da, u yo‘qolib ketishi ehtimoldan yiroq. Bu haqda “Rospotrebnadzor” Epidemiologiya markaziy instituti shifokorlari Eduard Shunkov va Vadim Pokrovskiy ma’lum qildi.Olimlar mutatsiya salohiyati yuqori bo‘lgan virus shtammlari tarqalish chog‘ida o‘zini qanday tutishini tushunib olganidan keyin pandemiya tugaydigan aniq muddatni aytish mumkin bo‘ladi, dedi Shunkov. Uning ta’kidlashicha, normal hayotga qaytish bo‘yicha aniq bir muddatlarni aytish mumkin emas, chunki pandemiyaning kechishiga nafaqat shtammlarning o‘zgaruvchanligi, balki odamlarning jamiyatdagi xulqi, shuningdek, vaksinatsiyaning samaradorligi ham ta’sir qiladi.
“Ko‘rib turibmizki, COVID-19 allaqachon ikki yildan buyon biz bilan birga. U raqobatga dosh bera olmasdan, kasallanish bo‘yicha boshqa O‘RVIlarga nisbatan yana birinchi o‘rinni olishi ehtimoli ham katta”, — dedi ekspert.
Shunkovning qo‘shimcha qilishicha, koronavirusning kuchsizroq shtammlari paydo bo‘lishi shunga olib kelishi mumkinki, infeksiya boshqa O‘RVIlar bilan raqobatlasha olmay qoladi va populyatsiyadan yo‘qolib ketadi. Ammo COVID-19 butunlay yo‘qolib ketmasdan, balki uning o‘lim darajasi va og‘ir kechish holatlari kamayishi ehtimolga yaqinroqdir, dedi u.
Bir necha yillar davomida koronavirusga grippga o‘xshab mavsumiy xarakterga ega bo‘ladi va ba’zi mamlakatlarda vaqti-vaqti bilan epidemiya bo‘lib turadi, deya uning fikriga qo‘shildi Pokrovskiy. Bu vaksinatsiyaning himoya effektining qancha davom etishiga bog‘liq, deya qo‘shimcha qildi u. Shuningdek, uning taxminiga ko‘ra, immuniteti pasaygan odamlar kuzda kasallanadi, bahorga kelib esa kasallanish darajasi pasayadi.
Mavzuga doir: COVID-19 mavsumiy shamollashga aylanib qoladi, Eronda koronavirusdan o‘limlar bo‘yicha rekord qayd etildi. Koronaxabarlar
- Yaponiyada koronavirus pandemiyasi sababli kiritilgan favqulodda vaziyat rejimi 1-oktabrdan bekor qilinadi. Cheklovlar asta-sekinlik bilan olib tashlanadi, shuningdek, mamlakatda COVID-19 ga qarshi kurashish uchun ko‘proq vaqtinchalik davolash muassasalari ochiladi hamda aholini emlash davom ettiriladi. Favqulodda vaziyat rejimi olti oydan ko‘proq davom etdi. Ayni paytda u mamlakatning 47 ta prefekturasidan 19 tasida amal qilmoqda.
- AQShda joylashgan Pfizer farmatsevtika kompaniyasi COVID-19 ga chalingan odam bilan bevosita muloqot qilingan holatda virusni yuqtirishning oldini olish uchun mo‘ljallangan ichiladigan antivirus dorisini keng sinovdan o‘tkazish bosqichi boshlanganini e’lon qildi. U “Ritonavir” dorisining kichik dozasi bilan birgalikda qabul qilinadi.
- Iordaniya valiahd shahzodasi Al Husayn ibn Abdulla koronavirusga topshirgan testi musbat natija berdi, shu sababli Iordaniya qiroli Abdulla II va uning rafiqasi qirolicha Raniya karantinga joylashtirildi. Mamlakatda emlanganlar uchun yakkalanish rejimi besh kunni tashkil etadi, qirol va qirolicha esa koronavirusga qarshi vaksina olgan.
Izoh (0)