Туркманистон парламенти президент Гурбангули Бердимуҳамедовни иккита медал билан тақдирлади – биринчиси «Жасур туркман» (Türkmen edermen) медали, иккинчиси мамлакат мустақиллигининг 30 йиллиги шарафига «Мустақил Туркман юртининг ҳимоячиси» (Garashsyz Turkmenistanyň Watan goragçysy) юбилей медали. Бу ҳақда Туркманистоннинг «Олтин аср» давлат газетаси хабар берди.
«Ватанимизнинг мудофаа қудратини мустаҳкамлашда эришилган юқори даражалар, улкан ютуқлар мени жасур халқимизнинг бахтли ва фаровон ҳаёти йўлида куч ва энергиямни аямай, тинимсиз меҳнат қилишга мажбур қилади», — деб ёзади Бердимуҳамедов.
Тақдирлаш маросимида Бердимуҳамедов «очиқ эшиклар» сиёсатини юритаётганини ва Туркманистон манфаатлари учун барча давлатлар билан яхши алоқада эканини айтди. Унинг таъкидлашича, мамлакат ўз мустақиллигини, мудофаа қобилиятини ва қонун устуворлигини мустаҳкамлаши ва ҳимоя қилиши керак.
Бердимуҳамедов, ўз навбатида, мудофаа вазири Бегенч Гундогдиев, ички ишлар вазири Овездурди Ходжиязов, бош прокурор Ботир Атдаев, Олий суд раиси Қувончмурод Уссанепесов, миллий хавфсизлик вазири Қурбонмурод Аннаев, Президент хавфсизлик хизмати раҳбари Давлатгелди Мередов ва бошқаларни «Мустақил Туркман юртининг ҳимоячиси» медаллари билан тақдирлади. Бердимуҳамедов мукофотларни мамлакат мустақиллигининг 30 йиллиги шарафига бағишланган ҳарбий парад аъло даражада ўтказилгани учун топширди.
Туркманистонда Мустақиллик куни 27 сентябрь куни нишонланади.
Аввалроқ Гурбангули Бердимуҳамедов, Вазирлар Маҳкамаси аъзолари ва парламент раиси мустақилликни мустаҳкамлашдаги хизматлари учун бир-бирларини «Türkmenistanyň Garaşsyzlygynyň 30 ýyllygyna» (Туркманистон мустақиллигининг 30 йиллигига») медаллари ва «Altyn şaý» эсдалик тангалари билан тақдирлаган эди.
Изоҳ (0)