Ijtimoiy tarmoqlarda “Bir oiladan uch inson tuhmat bilan qamoqda o‘tiribdi” sarlavhali videomurojaat tarqaldi. Unda Qashqadaryo viloyati Mirishkor tumanida yashovchi ayol eri, qaynota va qaynog‘asi nohaq qamoqqa olingani, 2020-yilning 4-oktabrida ro‘y bergan qotillikni ularning bo‘yniga qo‘yishga urinishayotganini, tergov ham soxtakorlik bilan o‘tganini aytgan. Bosh prokuratura ushbu holat yuzasidan ma’lumot berdi.
Aniqlanishicha, 2020-yilning 4-oktabrida Mirishkor tumani, Chandir qishlog‘ida yashagan ikki nafar shaxsning murdalari qotillik alomatlari bilan hamda Sh.J. va voyaga yetmagan D.A. og‘ir tan-jarohatlari bilan hushsiz holatda topilgan.
Mazkur holat yuzasidan Mirishkor tuman prokuraturasi tomonidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan. Jinoyat ishi bo‘yicha uch nafar shaxsga ayb e’lon qilinib, ularga nisbatan qamoqqa olish tarzidagi ehtiyot chorasi qo‘llanilgan.
“Jinoyat ishi mazmunan ko‘rib chiqish uchun Qashqadaryo viloyat sudiga yuborilgan. Hozirda jinoyat ishi Qashqadaryo viloyat sudida ko‘rilmoqda”, — deyiladi Bosh prokuratura xabarida.
Mavzuga doir:
- “O‘zbekistonda qonun yo‘q”, deya norozilik bildirilayotgani aks etgan video bo‘yicha rasmiy ma’lumot berildi
- Bir guruh ayollar O‘zbekiston hukumati binosi oldida norozilik namoyishi uyushtirdi
- Tazyiq o‘tkazilgani haqida Prezidentga murojaat yo‘llagan urgutlik aka-uka videosi yuzasidan ma’lumot berildi
Izoh (0)