“Tolibon” mamlakatdan qochib ketgan prezident Ashraf G‘anining topshirilishini talab qilmaydi, ammo u o‘zi bilan olib ketgan deb taxmin qilinayotgan pullarni qaytarishni xohlaydi. Bu haqda “RIA Novosti”ga bergan intervyusida Afg‘onistondagi muvaqqat hukumat madaniyat va axborot vaziri o‘rinbosari Zabihulla Mujohid ma’lum qildi.
“Ashraf G‘ani davlat mablag‘larini o‘g‘irlab ketdi, biz esa ularni qaytarishni talab qilamiz. Ular xalqqa va bizning banklarimizga tegishli”, — dedi Mujohid.
15-avgust kuni “Tolibon” Kobulga kirib, prezident saroyini egallab oldi va mamlakatdagi hokimiyatni o‘z qo‘liga olganini e’lon qildi. Shu kuniyoq Afg‘oniston prezidenti Ashraf G’ani mamlakatdan qochib ketdi. Bir necha kundan keyin u oilasi bilan Birlashgan Arab Amirliklarida ekani ma’lum bo‘ldi. 18-avgust kuni G‘ani Afg‘oniston xalqiga murojaat yo‘llab, mamlakatga qaytishga va’da berdi. G‘ani buning uchun maslahatlashuvlar olib borayotganini aytdi, ammo aynan kim bilan ekanini ochiqlamadi.
Prezident qochib ketganidan keyin u o‘zi bilan moddiy boyliklar, shu jumladan, juda katta qiymatda naqd pul olib ketgani haqida ma’lumot paydo bo‘ldi. G‘anining o‘zi bu ayblovlarni yolg‘on va “mutlaqo asossiz” deb atadi.
Ashraf G‘ani Afg‘onistonga 2014-yildan boshlab prezidentlik qilgan. 1990-yillarda u Jahon bankida ishlagan, shuningdek, BMTning Afg‘onistonga gumanitar yordamni muvofiqlashtirish boshqarmasi rahbari bo‘lgan.
Avvalroq “Tolibon” guruhi prezident Ashraf G‘ani hamda vitse-prezident Amrulla Solih va davlat rahbarining milliy xavfsizlik bo‘yicha maslahatchisi Hamdulla Muhibning xavfsizligi ta’minlanishini kafolatlagan edi.
7-sentabr kuni “Tolibon” harakati Afg‘oniston hukumatining yangi tarkibini e’lon qilgandi. Muhammad Hasan Ohund “Tolibon” tuzgan yangi hukumatning rahbari bo‘ldi. Mulla Abdul G‘ani Barodar bosh vazir o‘rinbosari bo‘ldi. “Haqqoniy tarmog‘i” guruhi asoschisining o‘g‘li Sirojiddin Haqqoniy esa ichki ishlar vaziri lavozimini egalladi. “Tolibon” asoschilaridan birining o‘g‘li Umar Yoqub mudofaa vaziri bo‘ldi.
Izoh (0)