Германиядаги парламент сайловларида Социал-демократик партия (ГСДП) 25,7 фоиз овоз билан ғолиб бўлмоқда. Мамлакат Федерал сайлов комиссиясининг барча 299 та округдаги маълумотлар ҳисоблаб чиқилганидан кейин берган дастлабки ахбороти шундан дарак бермоқда, деб ёзади «РБК». Аввалроқ экзитполлар ҳам социал-демократларнинг ғалабасини кўрсатган эди.
Иккинчи ўринда Христиан-демократик иттифоқ ва Христиан-социал иттифоқ (ХДИ/ХСИ) бормоқда, уларни сайловчиларнинг 24,1 фоизи қўллаб-қувватлади. Deutsche Welle қайд этишича, бу консерватив блок тарихида федерал сайловларда кўрсатилган энг ёмон натижадир.
«Яшиллар» 14,8 фоиз, Эркин демократик партия — 11,5 фоиз, «Германия учун альтернатива» — 10,3 фоиз овоз тўплаган.
«Сўллар» партиясига сайловчиларнинг 4,9 фоизи овоз берди. У Берлин ва Лейпцигдаги сайлов округларида учта тўғридан-тўғри мандатни қўлга киритгани туфайли парламентга ўтади.
2017 йилги сайловларга қиёслаганда ХДИ/ХСИ натижаси 8,9 фоизга пасайган. ГСДП 5,2 фоизга кўпроқ, «Яшиллар» эса 5,9 фоизга кўпроқ овоз тўплади. «Яшиллар» 4,3 фоиз, «Германия учун альтернатива» эса 2,3 фоизга камроқ овоз йиғган.
Германияда парламент сайловлари 16 йил ичида биринчи марта амалдаги канцлер Ангела Меркелсиз ўтди. У 2018 йилдаёқ Христиан-демократик иттифоқ раҳбарлигидан кетиб, канцлер лавозимидаги тўртинчи муддати якунлангач, сиёсатни тарк этишини эълон қилган эди.
Сайловда овоз бериш якунлангач, канцлер лавозимига асосий даъвогарлар — ГСДПдан Олаф Шолс ва ХДИ/ХСИдан Армин Лашет Германиянинг янги ҳукуматини шакллантиришга тайёрлигини билдирди. Шолснинг фикрича, унинг партияси вазирлар маҳкамасини тузиш учун мандатга эга бўлган. Лашет ХДИ/ХСИ билан федерал ҳукумат шакллантириш учун бор имкониятни ишга солишга ваъда берди.
Лашет Германияда учта сиёсий партиядан иборат ҳукмрон коалиция тузилиши мумкинлигини айтди. Жорий ҳукмрон коалиция таркибига ХДИ/ХСИ ва ГСДП киради.
Изоҳ (0)