Islandiyada parlament saylovlaridagi ovozlarni sanash jarayoni yakunlandi, deb yozadi “Korrespondent.net”.
Saylov yakunlariga ko‘ra, hukmron partiyalar parlamentda ko‘pchilik o‘rinni saqlab qolmoqda. Bundan tashqari, Islandiya tarixida birinchi marta parlamentga kiradigan ayollar erkaklarga qaraganda ko‘proq bo‘ladi (33 nafarga 30 nafar).
AFP ma’lumotlariga ko‘ra, bu nafaqat Islandiya, balki butun Yevropada ham birinchi shunday holatdir: qonunchilik organidagi ayollar soni bo‘yicha shu paytgacha birinchi o‘rinni egallab kelgan Shvetsiyada deputat ayollar parlamentdagi o‘rinlarning 47 foizini band qilgan. Islandiyada esa bu ko‘rsatkich endi 52 foizdan oshdi.
Ta’kidlanishicha, dastlab hukmron siyosiy kuchlar jami 39 ta mandatni qo‘lga kiritishi prognoz qilingan edi. Ammo yakunda ular 63 ta o‘rindan 37 tasiga ega bo‘ldi — xuddi avvalgi Alting (Islandiya parlamenti)da faoliyati boshida bo‘lganidek.
Saylovlarda biznes tarafdori bo‘lgan Mustaqillik partiyasi g‘olib bo‘ldi, u ovozlarning 24 foizini qo‘lga kiritib, eng ko‘p — 16 ta mandatga ega bo‘ldi. O‘z navbatida hukmron koalitsiyadan o‘ng markazchilarning Progressiv partiyasi parlamentning avvalgi tarkibiga taqqoslaganda beshta ko‘p — 13 ta o‘ringa ega bo‘ldi.
Ayni vaqtda so‘l yashillar 12,6 foiz ovoz to‘plab, uchta mandatni qo‘ldan chiqardi — endi ularda 11 ta o‘rniga 8 ta o‘rin bo‘ladi. Vaholanki, bu de-fakto faqat bitta o‘rin yo‘qotilganini bildiradi, chunki qolgan ikki deputat saylovdan keyin darhol partiyadan chiqib ketgan edi. Xalq partiyasi 6 ta mandatni qo‘lga kiritdi — bu qonunchilik organining avvalgi tarkibidagidan ikkitaga ko‘p. Viðreisn — 5 ta, Qaroqchilar partiyasi va sotsial-demokratlar — 6 tadan, markazchilar partiyasi — 4 ta mandatga ega bo‘ldi.
Izoh (0)