Oliy Majlis Qonunchilik palatasidagi “Adolat” sotsial-demokratik partiyasi fraksiyasi avtomobil tezligini belgilangan tezlikdan oshirgani uchun jarima miqdorini kamaytirishni taklif qildi. Bu haqda partiya deputati Qodir Jo‘rayev 23-sentabr kuni qonun loyihasi fraksiya muhokamasidan so‘ng Telegram kanalida ma’lum qildi, deya xabar qilmoqda “Gazeta.uz”.
24-sentabr kuni parlament quyi palatasi “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida”gi qonun loyihasini birinchi o‘qishda ko‘rib chiqdi.
Qodir Jo‘rayevning so‘zlariga ko‘ra, “Adolat” partiyasi qonun loyihasiga Ma’muriy javobgarlik to‘g‘risidagi kodeksning 128-3-moddasi (transport vositalari haydovchilarining belgilangan harakat tezligini oshirib yuborishi) ikkinchi qismi sanksiyasidagi jarima miqdorini amaldagi bazaviy hisoblash miqdorining 5 baravari o‘rniga 3 baravar qilib belgilash taklif etilgan.
Partiyaning taklifi mashhur blogerlar va jamoatchilik tomonidan tanqid qilindi.
Adliya vazirligi esa vazir Ruslanbek Davletovga tayanib, shu kuni qonun loyihasida ushbu qonunbuzarlik uchun jarimani kamaytirish nazarda tutilmaganligini e’lon qildi.
Mavzuga doir: O‘zbekistonda o‘tgan to‘rt oy ichida sodir bo‘lgan YTHlar oqibatida 557 kishi halok bo‘ldi
Huquqshunos, Milliy axborot agentligi (O‘zA) rahbarining o‘rinbosari va bloger Xushnudbek Xudoyberdiyev o‘limga sabab bo‘luvchi qonunbuzarlik uchun jarimani kamaytirishni mantiqsiz deb atadi.
“Ruxsatsiz tonirovka hech kimga ziyon qilmasa ham salkam 7 million so‘mdan 11 million so‘mgacha jarima belgilangan bir paytda yuzlab odamlar o‘limiga sabab bo‘ladigan yuqori tezlik uchun jarimani kamaytirish mantiqsizlik (ahmoqlik deyishga istihola qildim).
Xo‘p, tushundik, deputatlarning ‘tonirovka’ masalasiga ‘tishi o‘tmaydi’, bu joyga kelganda ular ko‘r va karga aylanib qoladi, lekin tezlikni oshirganlik uchun jarimani kamaytirishga balo bormi, hayronman?”, – deydi huquqshunos.
Iqtisodchi Behzod Hoshimov yo‘l harakati qoidalarini buzganlik uchun jarimalar, bu haqda xabar qilganlarga rag‘batlantirish miqdorini oshirish kerakligini ta’kidladi.
“Yo‘l qoidasi buzganlar uchun jarimalar, ular haqida xabar bergan insonlar uchun rag‘batlar ko‘payishi kerak. Eng muhimi, sug‘urta tizimi joriy etilishi lozim, axir sug‘urta insonlar hayotini saqlovchi vosita. Maqsad — insonlar hayotini saqlash. Yiliga buncha ko‘p odam avtomobillar dastidan halok bo‘lishi insonlar xavfsizligiga beparvolikni anglatadi”, — dedi u.
Jurnalist Xurshid Daliyev esa jarimalarni kamaytirish taklifini “toza lobbi” deb hisoblaydi. “Kunora oddiy odamlar tezlik qurbonlari bo‘layotgan bir paytda xalqning ustidan kulishday gap bo‘libdi”, – deydi u.
Mashhur “Davletovuz” blogi asoschisi, jurnalist Qobil Xidirov shunday deb yozgan: “Qarorni faqat mashinada yuradigan odamlar qabul qilsa, shunaqa bo‘ladi: faqat o‘ziga qulay bo‘lishini istayveradi”.
Izoh (0)