Олий Мажлис Қонунчилик палатасидаги «Адолат» социал-демократик партияси фракцияси автомобиль тезлигини белгиланган тезликдан оширгани учун жарима миқдорини камайтиришни таклиф қилди. Бу ҳақда партия депутати Қодир Жўраев 23 сентябрь куни қонун лойиҳаси фракция муҳокамасидан сўнг Telegram каналида маълум қилди, дея хабар қилмоқда «Gazeta.uz».
24 сентябрь куни парламент қуйи палатаси «Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида»ги қонун лойиҳасини биринчи ўқишда кўриб чиқди.
Қодир Жўраевнинг сўзларига кўра, «Адолат» партияси қонун лойиҳасига Маъмурий жавобгарлик тўғрисидаги кодекснинг 128-3-моддаси (транспорт воситалари ҳайдовчиларининг белгиланган ҳаракат тезлигини ошириб юбориши) иккинчи қисми санкциясидаги жарима миқдорини амалдаги базавий ҳисоблаш миқдорининг 5 баравари ўрнига 3 баравар қилиб белгилаш таклиф этилган.
Партиянинг таклифи машҳур блогерлар ва жамоатчилик томонидан танқид қилинди.
Адлия вазирлиги эса вазир Русланбек Давлетовга таяниб, шу куни қонун лойиҳасида ушбу қонунбузарлик учун жаримани камайтириш назарда тутилмаганлигини эълон қилди.
Билдирилган реакцияларҲуқуқшунос, Миллий ахборот агентлиги (ЎзА) раҳбарининг ўринбосари ва блогер Хушнудбек Худойбердиев ўлимга сабаб бўлувчи қонунбузарлик учун жаримани камайтиришни мантиқсиз деб атади.
«Рухсатсиз тонировка ҳеч кимга зиён қилмаса ҳам салкам 7 миллион сўмдан 11 миллион сўмгача жарима белгиланган бир пайтда юзлаб одамлар ўлимига сабаб бўладиган юқори тезлик учун жаримани камайтириш мантиқсизлик (аҳмоқлик дейишга истиҳола қилдим).
Хўп, тушундик, депутатларнинг ‘тонировка’ масаласига ‘тиши ўтмайди’, бу жойга келганда улар кўр ва карга айланиб қолади, лекин тезликни оширганлик учун жаримани камайтиришга бало борми, ҳайронман?», – дейди ҳуқуқшунос.
Иқтисодчи Беҳзод Ҳошимов йўл ҳаракати қоидаларини бузганлик учун жарималар, бу ҳақда хабар қилганларга рағбатлантириш миқдорини ошириш кераклигини таъкидлади.
«Йўл қоидаси бузганлар учун жарималар, улар ҳақида хабар берган инсонлар учун рағбатлар кўпайиши керак. Энг муҳими, суғурта тизими жорий этилиши лозим, ахир суғурта инсонлар ҳаётини сақловчи восита. Мақсад — инсонлар ҳаётини сақлаш. Йилига бунча кўп одам автомобиллар дастидан ҳалок бўлиши инсонлар хавфсизлигига бепарволикни англатади», — деди у.
Журналист Хуршид Далиев эса жарималарни камайтириш таклифини «тоза лобби» деб ҳисоблайди. «Кунора оддий одамлар тезлик қурбонлари бўлаётган бир пайтда халқнинг устидан кулишдай гап бўлибди», – дейди у.
Машҳур «Давлетовуз» блоги асосчиси, журналист Қобил Хидиров шундай деб ёзган: «Қарорни фақат машинада юрадиган одамлар қабул қилса, шунақа бўлади: фақат ўзига қулай бўлишини истайверади».
Изоҳ (0)