Farg‘ona viloyatining Buvayda tumanida homilador xotini va qaynotasini chopqi bilan chopib tashlagan 19 yoshli yigitga sud hukmi o‘qildi. Bu haqda “Daryo”ga Jinoyat ishlari bo‘yicha Yozyovon tuman sudi raisi Rahmatjon Arapov ma’lum qildi.
Qayd etilishicha, 2021-yilning 2-martidan 3-martiga o‘tar kechasi Buvayda tumani “Yangiqishloq” mahallasida yashovchi 19 yoshli fuqaro K.I. Oqtepa qishlog‘ida yashovchi qaynotasi A.I. hamda homilador ayoli S.I.ni o‘zaro oilaviy kelishmovchilik sabab chopqi bilan chopib tashlagan.Oqibatda qaynota og‘ir tan jarohati olib, ko‘rsatilgan birinchi tez tibbiy yordamga qaramasdan vafot etgan. S.I. esa shifoxonaning jonlantirish bo‘limiga yotqizilgan va shifokorlarning sa’y-harakatlari bilan uning hayoti saqlab qolingan.
Sudga oid tibbiy ekspertizaning 2021-yil 26-martdagi xulosasida marhum A.I.ning bosh miya ochiq shikasti, kalla suyaklarining sinishi, miya yumshoq pardalari ostiga va miya moddasiga qon quyilishi, bosh miya lat yeyishidan kelib chiqqani, ushbu jarohatlar uning o‘limiga olib kelgan og‘ir tan jarohat hisoblanishi ko‘rsatilgan.
Jinoyat ishlari bo‘yicha Yozyovon tuman sudining 2021-yil 17-avgustdagi hukmi bilan K.I. Jinoyat kodeksining 97-moddasi 2-qismi “v”, “j” bandlari (aybdorga ayon bo‘lgan ojiz ahvoldagi shaxsni o‘ta shafqatsizlik bilan o‘ldirish) 25, 97-moddasi 2-qismi “a”, “v”, “j” bandlarida nazarda tutilgan jinoyatlarni sodir etganlikda aybli deb topilib, 20 yilga ozodlikdan mahrum etildi.
Izoh (0)