British Airways’ning yo‘lovchisi vafot etgani uchun Toshkentga qo‘nishga majbur bo‘lgan samolyotida nosozlik aniqlandi. Layner vaqtincha aeroportda qoladi

British Airways’ning 22-sentabr kuni Islomoboddan Londonga uchayotgan Boeing 777-200ER samolyoti reysdagi 83 yoshli yo‘lovchi ayol o‘zini yomon his qilgani uchun Islom Karimov nomidagi Toshkent xalqaro aeroportiga qo‘nishga majbur bo‘lgani haqida xabar berilgan edi. Samolyot Toshkentga yetib kelganida ayol vafot etgan.

Telegram’dagi “Novosti Tashkentskogo neba” kanalining xabar berishicha, samolyotga yoqilg‘i quyilgandan so‘ng, yonilg‘i nasosi ishlamay qolgan. Parvozni davom ettirish uchun DDG / MEL texnik amaliyotini bajarish kerak bo‘lgan.

British Airways bortida texnik xodimlar yo‘q edi, Uzbekistan Airways Technics muhandislik xodimlari esa B777 samolyotlariga texnik xizmat ko‘rsatish litsenziyasiga ega bo‘lmagan.

Shunga qaramay, Buyuk Britaniya Aviatsiya boshqarmasi zarur ishlarni bajarish va parvozlar jurnalini tuzish uchun bir martalik ruxsatnoma berdi. Shundan so‘ng Uzbekistan Airways Technics tomonidan B757 / B767 / B787 samolyotlarida ishlash bo‘yicha katta tajribaga ega bo‘lgan muhandis ajratildi. Taqdim etilgan hujjatlarni tekshirilgandan so‘ng, ta’mirlash ishiga ruxsatnoma oldi. Tegishli ishlar yakunlangach, samolyot foydalanishga topshirildi.

Biroq xabarda aytilishicha, ekipajning ish vaqti tugagani sababli samolyot ucha olmadi va ekipaj dam olguncha Toshkent aeroportida qoldi.