Qashqadaryo viloyati Qarshi shahrida jamiyatda yurish-turish qoidalarini mensimasdan o‘zaro janjal qilgan shaxslarni tartibga chaqirgan IIB xodimlariga qarshilik ko‘rsatganlarga jinoyat ishi qo‘zg‘atildi. Bu haqda viloyati IIB axborot xizmati xabar berdi.
Ma’lum qilinishicha, shaharning Islom Karimov ko‘chasida joylashgan “Dori-darmon” MChJga qarashli dorixona ro‘parasida 20-sentabr kuni soat taxminan 22:20 lar “Sho‘rtan” MFYda yashovchi fuqaro o‘zining oldindan tanishi bo‘lgan ikki shaxs bilan bir-birini haqoratlab, baqirib, yon-atrofdagi fuqarolar tinchini buzgan. Ular jamiyatda yurish-turish qoidalarini qasddan mensimasdan o‘zaro janjal qilayotgan vaqtda viloyat IIB PPX xodimlari jamoat tartibini saqlash hamda oldini olish maqsadida fuqarolar oldiga borgan.
Janjal qilayotgan fuqarolar IIB PPX xodimlarini qonuniy talabiga bo‘ysunmasdan, ichki ishlar organlari xodimlari xizmat kiyimini yirtib, qo‘lini tishlab faol qarshilik ko‘rsatgan.
Mazkur holat yuzasidan 21-sentabrda Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi va 277-moddasi (bezorilik) 3-qismi “g” bandi bilan jinoyat ishi qo‘zg‘atilib, uchala shaxs ham gumon qilinuvchi tariqasida jalb qilindi. Jinoyat-protsessual kodeksining 221-moddasi tartibda ushlangan.
Jinoyat ishi bo‘yicha dastlabki tergov harakatlari Qarshi shahar prokuraturasi tomonidan olib borilmoqda.
Avvalroq Toshkentda YPX xodimlariga faol qarshilik ko‘rsatgan erkakka nisbatan jinoyat ishi ochilgani, Farg‘onada mast erkak IIB xodimini bolta bilan urib, jarohat yetkazgani, Toshkentda fuqaro ichki ishlar xodimiga “kalla qo‘ygani” to‘g‘risida xabar berilgandi.
Izoh (0)