British Airways’нинг йўловчиси вафот этгани учун Тошкентга қўнишга мажбур бўлган самолётида носозлик аниқланди. Лайнер вақтинча аэропортда қолади

British Airways’нинг 22 сентябрь куни Исломободдан Лондонга учаётган Boeing 777-200ER самолёти рейсдаги 83 ёшли йўловчи аёл ўзини ёмон ҳис қилгани учун Ислом Каримов номидаги Тошкент халқаро аэропортига қўнишга мажбур бўлгани ҳақида хабар берилган эди. Самолёт Тошкентга етиб келганида аёл вафот этган.

Telegram’даги «Новости Ташкентского неба» каналининг хабар беришича, самолётга ёқилғи қуйилгандан сўнг, ёнилғи насоси ишламай қолган. Парвозни давом эттириш учун DDG / MEL техник амалиётини бажариш керак бўлган.

British Airways бортида техник ходимлар йўқ эди, Uzbekistan Airways Technics муҳандислик ходимлари эса B777 самолётларига техник хизмат кўрсатиш лицензиясига эга бўлмаган.

Шунга қарамай, Буюк Британия Авиация бошқармаси зарур ишларни бажариш ва парвозлар журналини тузиш учун бир марталик рухсатнома берди. Шундан сўнг Uzbekistan Airways Technics томонидан B757 / B767 / B787 самолётларида ишлаш бўйича катта тажрибага эга бўлган муҳандис ажратилди. Тақдим этилган ҳужжатларни текширилгандан сўнг, таъмирлаш ишига рухсатнома олди. Тегишли ишлар якунлангач, самолёт фойдаланишга топширилди.

Бироқ хабарда айтилишича, экипажнинг иш вақти тугагани сабабли самолёт уча олмади ва экипаж дам олгунча Тошкент аэропортида қолди.