Respublika maxsus komissiyasining navbatdagi yig‘ilishida O‘zbekistonda karantin talablarini qisqartirish orqali aholiga madaniy va ma’naviy hordiq chiqarish hamda dam olishini mazmunli o‘tkazish uchun qulay shart-sharoitlar yaratish masalasi atroflicha muhokama qilindi, deb xabar beradi SSV matbuot xizmati.
Xususan, tegishli mutasaddi tashkilotlarning takliflarini inobatga olgan holda, to‘y va oilaviy marosimlarni o‘tkazish bo‘yicha ilgari belgilangan cheklovlar yumshatilib, 2021-yilning 20-sentabridan to‘yxonalarda oilaviy tantana, to‘y, ma’raka va marosimlarni o‘tkazish 100 kishidan ko‘p bo‘lmagan hamda sanitariya va gigiyena talablariga qatiy rioya etgan holda o‘tkazilishiga ruxsat berildi.
Eslatib o‘tamiz, O‘zbekistonda 1-avgustdan to‘y va marosimlarni 50 kishidan ko‘p bo‘lmagan holda o‘tkazish belgilangandi. Keyinroq to‘ylarni o‘tkazishga qo‘yilgan cheklov 20-iyuldan kuchga kiradigan bo‘lgan edi.
O‘zbekistonda koronavirus epidemiyasi tarqalishining oldini olish maqsadida 2020-yil 23-martdan e’tiboran ommaviy tadbirlar, xususan, to‘y-marosimlarning o‘tkazilishi taqiqlangan. Ushbu taqiqdan so‘ng to‘y marosimlarini o‘tkazishga uringanlarga nisbatan hatto jinoyat ishi ham qo‘zg‘atilgan. Mamlakatda epidemiologik vaziyat barqarorlashib, nisbatan nazorat ostiga olingach Respublika maxsus komissiyasining 30-maydagi qarori bilan “yashil” toifaga kiritilgan hududlarda oilaviy tantana, to‘y, ma’raka va marosimlarni 30 kishidan ko‘p bo‘lmagan holda o‘tkazishga ruxsat berilgandi. Mamlakatda koronavirus bilan bog‘liq vaziyat keskinlashgani sababli 10-iyuldan boshlab mamlakatda to‘ylarni o‘tkazish yana taqiqlangandi. Shundan so‘ng 15-avgustdan 30 kishilik to‘ylarni o‘tkazishga yana ruxsat berilgan. 2021-yilning 1-aprelidan to‘yxonalarda oilaviy tantana, to‘y, ma’raka va marosimlarni o‘tkazish 100 kishidan ko‘p bo‘lmagan hamda sanitariya va gigiyena talablariga qat’iy rioya etgan holda o‘tkazilishi belgilangan edi.
Izoh (0)