Республика махсус комиссиясининг навбатдаги йиғилишида Ўзбекистонда карантин талабларини қисқартириш орқали аҳолига маданий ва маънавий ҳордиқ чиқариш ҳамда дам олишини мазмунли ўтказиш учун қулай шарт-шароитлар яратиш масаласи атрофлича муҳокама қилинди, деб хабар беради ССВ матбуот хизмати.
Хусусан, тегишли мутасадди ташкилотларнинг таклифларини инобатга олган ҳолда, тўй ва оилавий маросимларни ўтказиш бўйича илгари белгиланган чекловлар юмшатилиб, 2021 йилнинг 20 сентябридан тўйхоналарда оилавий тантана, тўй, маърака ва маросимларни ўтказиш 100 кишидан кўп бўлмаган ҳамда санитария ва гигиена талабларига қатий риоя этган ҳолда ўтказилишига рухсат берилди.
Эслатиб ўтамиз, Ўзбекистонда 1 августдан тўй ва маросимларни 50 кишидан кўп бўлмаган ҳолда ўтказиш белгиланганди. Кейинроқ тўйларни ўтказишга қўйилган чеклов 20 июлдан кучга кирадиган бўлган эди.
Ўзбекистонда коронавирус эпидемияси тарқалишининг олдини олиш мақсадида 2020 йил 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилган. Мамлакатда эпидемиологик вазият барқарорлашиб, нисбатан назорат остига олингач Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилганди. Мамлакатда коронавирус билан боғлиқ вазият кескинлашгани сабабли 10 июлдан бошлаб мамлакатда тўйларни ўтказиш яна тақиқланганди. Шундан сўнг 15 августдан 30 кишилик тўйларни ўтказишга яна рухсат берилган. 2021 йилнинг 1 апрелидан тўйхоналарда оилавий тантана, тўй, маърака ва маросимларни ўтказиш 100 кишидан кўп бўлмаган ҳамда санитария ва гигиена талабларига қатъий риоя этган ҳолда ўтказилиши белгиланган эди.
Изоҳ (0)