Qashqadaryo viloyatining sobiq hokimi Ozod Parmonov hamda amaldagi hokim Zoir Mirzayev viloyatning Dehqonobod tumanida bo‘lib o‘tgan uch avlod uchrashuvida ishtirok etdi, deya xabar berdi “Daryo” muxbiri.
Qayd etilishicha, 18-sentabr kuni Dehqonobod tumanida uch avlod uchrashuvi bo‘lib o‘tgan. Unda keksa, o‘rta va yosh avlod vakillari tumanda so‘nggi besh yilda amalga oshirilgan islohotlar bilan tanishtirilgan.
“Uch avlod uchrashuvida yetti yoshdan sakson, hatto sakson besh yoshgacha bo‘lgan keksa yoshlilar bir joyga jam qilinib, hokimlik tomonidan tashkil etilgan avtobuslarda tumanga sayohat uyushtirildi. Jumladan, ishtirokchilar tumanda so‘nggi besh yilda amalga oshirilgan ishlar bilan tanishtirildi. Dastlab 2018-yilda qurilgan Motamsaro ona haykali poyiga gullar qo‘yilgan bo‘lsa, keyin 2020-yil foydalanishga topshirilgan istirohat bog‘ida sayr qilindi. So‘ngra 600 ming kitob fondiga ega kutubxona bilan, undan keyin esa Oqsuv—Dehqonobod loyihasi bilan tanishtirildi”, — deydi tuman hokimi o‘rinbosari Bahodir Omonov.
Ta’kidlanishicha, tadbir so‘ngida viloyat hokimi Zoir Mirzayev, viloyatga 1995—1998-yillarda rahbarlik qilgan Ozod Parmonov, Dehqonobod tumaniga 1971—1975-yillar, shuningdek, 1988—1992-yillarda rahbarlik qilgan Yanvar Inoyatovlar ishtirokida konsert dasturi tashkil etilgan.
Uch avlod uchrashuvida so‘z olgan tumanning birinchi rahbari Yanvar Inoyatov tumanga rahbarlik qilish ikki marotaba nasib etganini, shu sababdan Dehqonobod tumaniga, xalqiga bo‘lgan mehri o‘zgachaligini ta’kidladi.
“Tumanga rahbar bo‘lib kelganimda hech narsa yo‘q edi: noldan boshlaganmiz. Dastlab tuman markazini qurish haqida bosh qotirganmiz va 1972-yil Qorashina shaharchasiga asos solganmiz. Ayni kunda shaharcha viloyatdagi eng chiroyli shaharchalardan biri hisoblanadi. Dehqonobodliklar bilan ikki marotaba ishlash nasib etgani uchunmi, tuman ahliga bo‘lgan mehrim o‘zgacha. Har safar tumanga kelsam, boshqacha hisni tuyaman”, — deydi Yanvar Inoyatov.
Izoh (0)