Buxoro viloyatining Olot tumanida 62 yoshli ayol yashash uyida 50 ming so‘m evaziga fuqarolar — Z.M. va A.H.larning jinsiy aloqa qilishi uchun sharoit yaratib bergan. Bu haqda “Daryo”ga Olot tuman IIB mas’uli xabar berdi.
Qayd etilishicha, mazkur holat tumanda o‘tkazilgan “Oriyat” tadbirida fosh etilgan.
Ta’kidlanishicha, tuman ichki ishlar bo‘limi tezkor guruhi xodimlari tomonidan “Xalqobod” mahallasida keng qamrovli profilaktik tadbir o‘tkazilgan. Tadbirda 62 yoshli nafaqadagi ayol X.M. uyi yotoqxonasida Z.M. hamda A.H.larning ishqiy munosabatda bo‘lishi uchun sharoit yaratib bergani ma’lum bo‘lgan.“50 ming so‘m pul evaziga o‘z uyi yotoqxonasida fohishaxona saqlab kelgan X.M. ning bundan ilgari ham qo‘shmachilik bilan shug‘ullanib kelgani oydinlashdi”, — deydi IIB mas’uli.
Aytilishicha, mazkur holat yuzasidan tuman IIB huzuridagi tergov guruhi tomonidan X.M.ga nisbatan Jinoyat kodeksining 131-moddasi (qo‘shmachilik qilish yoki fohishaxona saqlash) bilan jinoyat ishi qo‘zg‘atilib, dastlabki tergov harakatlari davom ettirilmoqda.
Eslatib o‘tamiz, shu modda bilan ayblangan fuqaroning aybi isbotlansa, u bazaviy hisoblash miqdorining ellik baravaridan yetmish besh baravarigacha miqdorda jarima yoki uch yuz oltmish soatgacha majburiy jamoat ishlari yoxud uch yilgacha axloq tuzatish ishlari bilan jazolanishi mumkin.
Izoh (0)