Toshkentda 4 nafar YPX xodimi haydovchini urgani aytilgan xabar yuzasidan xizmat tekshiruvi yakunlandi

Avvalroq Ijtimoiy tarmoqda “4 nafar GAI xodimlari meni urdi” sarlavhasi ostida tarqalgan video yuzasidan xizmat tekshiruvi tayinlangandi.

Eslatib o‘tamiz, 2021-yil 14-iyul kuni soat 16:00 larda Toshkent shahar IIBB YHXB YPX inspektorlari I.Toshmatov va S.Begmatovlar “A.Turbanov” YPX maskanida xizmat olib borayotgan vaqtda Isuzu yuk avtomashinasi haydovchisi xodimlarning to‘xtash ishorasiga bo‘ysunmay harakatda davom etgan.

Ko‘rilgan tezkor chora-tadbirlar natijasida transport vositasi to‘xtatilgan va tekshirish davomida haydovchining hujjatlari to‘liq emasligi aniqlangan.

Haydovchiga Ma’muriy javobgarlik to‘g‘risidagi kodeksning 135 (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi), 194-moddalariga (ichki ishlar organlari xodimining qonuniy talablarini bajarmaslik) asosan ma’muriy bayonnoma rasmiylashtirilib, avtomashina jarima maydoniga joylashtirilgan.

YHXBB axborot xizmatining ma’lum qilishicha, holat yuzasidan xizmati tekshiruvi yakunlangan.

Tekshiruv yakuniga ko‘ra, Isuzu rusumli avtomobil haydovchisi N.O.ga nisbatan Ma’muriy javobgarlik to‘g‘risidagi kodeksning 135 hamda 194-moddalari tartibida rasmiylashtirilgan bayonnoma asosli deb topilib, YPX xodimlari tomonidan xizmat o‘tash vaqtida belgilangan qaror va buyruq talablari buzilmagani aniqlangan.